Tantona se agabay Sumiati mandhang labang coma
settong, Lukman, tong-settonga ana’na se ta’ bakal mole dhari Bali bulan poasa
reya asabab otang se alelet e kaodhi’anna.
Ongguna sabelunna, Lukman epaenga' mon ebuna, na’-kana saomoranna tanto gi’
bur-leburanna asakolah. Ka angguy alako banne baktona. Lukman se gi’ buru
kaloaran SMA, pekkerenna gi’ kana’ sara. Polana bannya’, banne gun ana’na,
tatangga laenna perna daddi careta sabelunna.
“Sengko’ la lesso se gi’ asakola’a!” oca’na Lukman
se settong bakto.
Ngedhing potosan dhari ana’na, Sumiati coma bisa
ngosap dhadha. Banne gun coma sakaleyan dhu kale Sumiati maenga’ mon oreng
alako tanto lebbi berra’ etembang moso reng asakola. Pekeranna Sumiati, mon
oreng asakola coma neggu’ buku, toju’ e kellas, ban ngedhing’agi apa se
eoca’agi mon guru. Mon alako, ngoras pello ban kakoatanna aba’. Laen pole ka
angguy nyokope pakan re-saarena. Se sakabbinna ngangguy ora’ ban pekkeran.
“Ba’na ta’ kera koat, Cong. Reng alakoh reya berra’
gi’ anyamanan asakola bai!”
“Engko’ coma neser ka ba’na, Bu’. Engko’ ta’ koat
mon nangale ba’na abanteng tolang sopaja engko’ bisa asakola. Dha-padhana ba’na
reya tang ro-soro.”
“Ongguna jareya se daddi kabunga’an, Cong. Bila
engko’ coma taseksa kaangguy ba’na asakola etembang engko’ coma bunga kalaban
kalakoanna se masossa ba’na.”
La biasa Sumiati saellana edina mate mon lakena, Mat
Sueb, kalakoanna ban arena coma ngare’ sopaja dhuwa’ owanan embi’na ngakan
nyaman. Coma jereya se ekalako, ta’ lebbi, meske kadhang ngala’ kalakowan ka
tatangga semma’na meske gun ngorae pereng otaba nganju ana’. Tape, dhalem
sangka’an Lukman, pesse se ekaolle dhari kalakowanna se nga’ rowa tantona ta’
kera kellar nyokope ka biaya sakola. Lukman paggun se melea alako sopaja reng
toana ta’ alako berra’ se akadi biasana.
“Dinala, Bu’. Sapa tao, kalaban pesse se ekandhi’
reya bisa nyokope kaangguy daddi modhal alako ka Bali.” Kalaban rassa ate se
berra’, Sumiati gun bisa abanto du’a. Pesse se sakone’ daddi barkatta alako.
Ban pangarap se tatanem dhalem ate ana’na sopaja akor ban pangaterrona.
Maos Jugan
- Konsonan Alos & Dhammang
- Hanya Slogan “annadhofatu minal iman"
- Susah Sinyal dan Pemain Bola
- Mudhar CH: Pengaro dhari Arach Jamali
***
Dhalem ate se gi’ aromasa berra’, e settong are, se
dhimma langnge’ coma ngombarragi sakone’ panas are se akaton pote olai.
Ser-kalessera angen, se kadhang ekarassa nyerpo’ ka kole’na Sumiati padha ban
kabar se samolana ta’ bisa ekangarte. E are jereya Lukman bakal ajalan
kaodhi’an se tantona gi’ badha kajanggalan asabab panggaliyan atena reng toana
gi’ korang lonas kaangguy magi ana’ sopaja bisa arassa dha’ kerassa kaodhi’an,
lebbi-lebbi pangaterrona Lukman se ngaota rajakke e kamponga oreng.
“Senga’ teggu’ tang oca’, se engko’ paggun bakal
mole bila ra’-para’ bulan poasa” oca’ Lukman kalaban soara teggassa. E bauna la
akae’ tas tor serta bi-sambiyan se laen.
Kalaban rassana ate se epaksa, Sumiati ta’ koat
masamar aengmata se nyapcap ka pepena. Agabay atena Lukman se saropa bato molae
ri’-bari’na pas ta’ mangga ngabas reng toana se ampon ramme ban ban oban e
cetakka. Namong, Lukman bangat partaja, reng toa coma nanges polana buru sateya
ana’ ban ebuna bakal apesa.
Kalemba’na teyang parao sajan majellas soara tanges
Sumiati asabab sakejja’ laggi’ Lukman bakal esambi, tor mapesa se tantona coma
bakal kaedhing soarana dhalam telpon. Satengka’ tor satengka’ dhari tindhakanna
sokona, Lukman aromasa ja’ bakal adaddiyagi kasossaan se teba dhalem ate ebuna.
Tape tetepan dhalem odhi’ saongguna dha’remma kalaban apesa bisa masamporna
kakorangan dhari kaodhi’an sanajan kalaban cara se reya adaddiyagi rassa
kerrong se talebat.
“Cokoppagi bai, Bu’, patoro’ se engko’ dha’
Pangeran.” Oca’ pongkasan se metto dhari bibirra Lukman dha’ ebuna. Sumiati
sajan ta’ mangga bila bit-abit nangale ropana Lukman se gi’ kana’ namong pasra
dha’ dharrasa badhana kaodhi’an. Dhung-kodhung se samolana eangguy daddi salbut
pola ekaosap aengmata se nyapcap.
Gun adina re-kare anga’na galluanna, Lukman pas
mangkat. Dhari jareya Sumiati aromasa kasta mamangkat ana’na ka Bali.
Re-saarena kalaban kaseddhiyan se bangat Sumiati ta’ bisa alako apa pole kajaba
coma ngabas jang-bajangannna labang, se katonna lampat sokona Lukman gi’ paggun
cekka’, dhang-kadhang pole Sumiati arassa’agi ro’om kalambina Lukman teba ka
elongnga.
Tape, kantos sateya labang coma kalemba’na
jang-bajanganna dibi’. Kerrong tor rassa se terro atemmowa pole bi’ Lukman
daddi barang se akalemba’ dhalem pekkerra. Namong abulan-bulan tadha’ saonce’
kabar se teba dhari Lukman. Sumiati coma bisa ngantos tor metong pangareppa se
ta’ bakal ampos.
Mon enga’ ka janji, Sumiati gi’ bisa mesem sanajan
lokana kerronga ate. Tape saamponna ngedhing ja’ saongguna Lukman la ta’ bisa
mole bulan poasa se bakal dhateng polana kalelet otang asabab ecapo’ tepo.
Sumiati ja’ kastana, tor ta’ tega mon enga’ ka ropana Lukman se gi’ kana’
taseksa asabab pasrana.
“Tedhung dhimma ba’na sateya, Na’. Mara mole la
para’ powasa’an. Mon ba’na pas ta’ mole, dhimma asaor ban abuka, cong Lukman?”
Aengmata Sumiati pas ngalocor sambi ngabas dha’ labang se atandha’agi ja’
ngareppa Lukman akalemba’ saropa rajana pangaterrona se pesa'a
Lancaran, 17 Februari 2023
*Ramli Q.Z. mahasiswa Instika kalaheran polo Raas.
Sanonto molae ababat kaodianna e Aliansi Pemuda Pesisir (Anasir) tor HMI
Komisariat Lancaran.