"Neser saestona,
naleka reng bine' samporna kadiya ba'na kodu odhi' abareng oreng enga' sengko'.
Tadha' lakona. Budhu orengnga. Talpos dunnyana."
E kamar gun kare
sengko' kadibi'. Tadha' reng laen. Tadha' sapa pole. Reng-oreng padha mangkat
alako. Alako ka saba. Arao panja'. Ngare' rebba. Ngala' rambanan. Langnge'
teppa'na ondhem. Ondhemma ta' pate kandel. Te-pote koddhu'. Ta' kera ojan. Keng
se mor-jemmor ta' kera kerreng. Sordhep bas-abasen.
"Mon kerana gun
marengsa'a ba'na. Sengko' neser keya. Ta' mangga keya."
"Tang taresna
pangaterro raja banne gun apolonga ban ba'na, tape mabunga'a ba'na. Apolong
ca'na. Tape ba'na ta' bisa bunga. Egabayya apa keya."
"Sajjagga rassa e
dhalem sokma tombu, settong pangaterro se ros-terrosan agili sampe' sateya gun
terro nangaleya ba'na mesem bunga, mekkar kadiya bang-kembang e bakto ra'-tera'
tana."
Nyalen kopi satengnga gellas.
Sa'arra noro'. Banne ta' esareng. Sakeng pajat kare ba-kababana. Mon odhi' gun
lakona ka bara' ka temor. Ta' enja' ta' iya. Tekka nemor lanjang ta' ambu
sakale. Otaba ojan dala banjir. Ta' kera gellem aoba. Lakar pajat malarat bila
daddi babatek acora' galiyan ban bato gunong. Manta'. Mental. Kacenthar mon
ebalai.
Sengko' gun bisa abanta.
Abanta kadibi'an. Neng-neng e kamar ta' aguliyan. Budhuna aba' ta' kaparan.
Malessa aba' ta' kenneng pellang. Sala ta' andi' pa-apa gi' ta' kenceng aguli
ma-baramma. Kan budhu sara. Mon oca'na mabunga'a, tape tadha' bukte pa-apa. Mon
pangakona ce' taresnana, tape tedhung malolo lakona.
Ros-terrosan aba' gun
bisa agarungngong. Ta' bu-ambu nyacae aba' se teppa'na bingong. Ngalengsang ta'
kamareyan. Ta' etemmowa ja' apa'an se daddi pekkeran. Tape se paleng nyata aba'
tako' ekoca' ngala' kareppa dibi' naleka maksa ba'na kodu apolong odhi' ban
sengko'.
"Ba'na reng bine'
se la mapan. Odhi'na la alangngoy e attas sampan. Balana la kabbi kacokopan.
Asakola. Andhi' lako bariya keya."
"Ngabas ba'-aba'an
gi' lur-guluran. Ta' kenceng se mandhiya lekka'. Se ekakanna gi' paka'. Se
kemma buggi' gi' etombui burca'. Otang possa'. Se epanyerra'a gi' tadha'."
Ajelling dhari padduna
candila, e loar rese'. E pepe bacca molae gi' laggu. Banne birnye sakeng ta'
kowat ngampet margana Nyai. Mandar gi' badha'a lik-baligga dhadhar. Aba' terro
keya adardarra labang. Maca buku sambi yol-seyolan. Nganju ana' asalawatan.
Ngabasagi bine se gi' buru mare asapowan.
"Sakalangkong se
raja, ba'na gi' kenceng narema sengko' se enga' reya. Bannya' korangnga. Tadha'
se eyambuagina."
"Tang janji eyadha'na
ba'na. Paggunna ta' kera ambuwa ngabbiyagi kakowatan ka'angguy mabunga
ba'na."
"Settong se
epenta, samoga ba'na terrossa sabbar tekka sengko' gun badhana enga'
reya."
Angenna e lowar bak
santa'. Rese'na ambu. Keng pepena paggun bacca. Dhadharra perreng bannya' se gaggar.
Dhaun se laen noro' atabuyan. Se cekka' namong se odhi'. Se paggun namong se
nalpe'. Odhi' pajat kodu bangal ka bu-tambu. Tebbel kopeng dhari cacana oreng.
Legga dhadha dari nyokkore se badha.
Mon laggu' gi' enga'
reya, pola sadhumalem aoba'a. Mon sadhumalem gi' paggunna, pola minggu dhateng
se eganteya. Ta' kera ros-terrosan angen nambu. Ta' kera gun-paggun se
nyalembu.
***
"Kaula neser ka
sampeyan dhari ate, Mas. Ta' kera mandeng pa-napa, napa pole dunnya."
Oca'na Mekkar naleka mare maca sorat se sengko' kerem ri'-bari'na. Laju nelpon
tengnga malem. Laju ngoca' rang-terrangan.
"Banne gun
sampeyan se buto ka badana kaula, kaula padha ta' bisa naleka kodu odhi' ta'
kalaban sampeyan, Mas."
"Sakalangkong...."
Aeng mata ta' bisa etamba'. Essena dhadha
cora' ta' kabuwa'. Asokkor raja gi' bisa etarema kalaban rida'. Oreng bine'
samporna se narema aba'.
"Taon dhateng
ba'na epenta'a, Le' ka reng towana."
"Nyambiya dudul
epagenna' ban geddhanga. Abundu'a neyat. Mekolla rida'na. Tabarenga ban garis
ontongnga."
"Matemmoa dhuwa' bala.
Manyettongnga rembak sopaja padha. Abugella sajja se la abit ereba. Ba'na
epenta epadaddiya bala."
"Amien...."
"Kaula adhante'a,
Mas." Sambi mesem. Matana nyarembeng. Bunga. Ngarep. Mandar tabarenga ban
pasthe.
Sumenep, 28/01/23
AJAZ Elmazry aropa’agi nyama khusus dhari Ach Jazuli. Lanceng paneka babbar e Disa Tambaksari, Rubaru, Songennep. Nganthang asakola dhri SDN Tambaksari tello’ tor lastare tawon 2010, nerrossagi mondhuk sambi asakola Tsanawiyah (2013) tor jugan Aliyah (2016) e Darul Ulum Prongpong. Lanceng se pelka’ elmo paneka nyare sakola’an se lebbi tenggi, mela dhari paneka, aba’na acangrep ka Program Study Tadris Bahasa Indonesia, Fakultas Tarbiyah, IAIN Madura, tanto kodu maso’ dhari S1-na, lastare tawon 2020. Aromasa ta’ cokop tor gi’ aromasa kakorangan elmo. Aneka lakar lanceng se korang ajar. Korang malolo. Saenggana dha’ ka’dhimma bai etabang. Akadiya ka se kodu mangkat ka Malang, ajar e Magister Pendidikan Bahasa Indonesia, UNISMA Malang, Jaba Temor. Tanto ta’ ga-oga. Samangken gi’ ngalakone tugas aherra se anyama Thesis.
