#SIARAN ULANG
Lalampan.
1444. Final Liga Cekeran Disa Karduluk ampon badha eadha’na mata, enggi ka’dhinto
bakal kalampa are mangken 15 Rabiul aher (10 November 2022) e sala settong
talonna masyarakat se epadaddi lapangan. Final epon antara PSDP B (kampong
Daleman) VS PERSIP (kampong Palalangan). Tantona dhuwa’ kampong kasebbut padha
dhari Karduluk. Nyamana bai liga cekeran (banne cakaran) antar kampong
(tarkam, banne torkoban). Dalam parjalananna, PERSIP Palalangan gun
mennang tepes, menang kene’, gun mennang 1-0 bila atandhing. 1-0 VS DENPASAR A,
VS PERSIGA 1-1 (3-2 mennang adu penalty), VS PSBR B 1-0, VS KARTIM D 1-0, VS
PERSIGA 0-0 (babak penyisihan). Dina
kala’ gampang gallu.
Bida
kalaban PSDP B se dujan tor ampo bannya’ mamaso’ bal ka gawang. Dhalem arebbu’
salembar tiket ka final, PSDP B kodu takeco’ ka adha’, namong nyongsang
nyonglet, apellowan sopaja PSDP B bisa ngeggolin, babak kapeng dhuwa’ bisa
padha 1-1, saenggana kodu adu penalty ban mennang. Mennang 2-1 ka PSDP A (se
aropa’agi seniorra), tor jugan ngantem DENPASAR B kalaban skor raja 3-0. Kalaban
akaca ka skor aher, PERSIP Palalangan patot ngastete.
PSDP
B andhi’ pamaen nyaman molae nomor sabellas se kadhang egante nomor 10,
strikerra nomor petto’ se ebanto nomor ballu’ e kalembang. Ejunjung kalaban
nomor petto bellas se nyamana Yayan se lako aberri’ ompan sopaja ebaltok pas
daddi gol. Yayan amaen gancang, akurasi tandu’anna ta’ baba, sajan bila bola
mate otamana bila eadha’na gawang. Lakar kodu ngastete. Bila Yayan amaen,
nyambi bal dhari budhi, aliyu’-liyu’ etengnga lapangan, akantha ola’ lenteng,
du’-leddu’an, dhapa’ adha’na gawang epajarabat. Gol. ta’ neng enthengngagi.
Back ban pajagana gawangnga PSDP B lakar padhana pagar nagara cena. Lanjang tenggi
tadha’ nandhinge.
Tabaligga
kalaban PERSIP e laga dhi-budhina paneka ta’ bisa mamaen nomor sapolona Anas,
asabab olle kartu mera bakto amaen kalaban PERSIGA Blajud. Dhalem dhang-ondhangnga,
pamaen mon olle kartu mera, ta’ olle amaen bal sampe tello kale pertandingan, ya pas sampe’ marena Liga
mare jiya, tor jugan wajib majar dhinda sagame’ebu (25K), jugan back kanan se
banne gun tasaleo namong jugan roga bakto amaen kalaban DENPASAR A. PERSIP
bakal amaen kalaban ginjat e final. Ta’ andhi’ tim pelapis se para’ padha’a,
asababbagi PERSIP bakal amaen kalaban badhana.
Pertandingan
are mangken bakal bannya’ se nenggu. Napa pole jat PERSIP se amaen, tanto sjan
ramme. Tantona banne gun Daleman otaba Palalangan, tantona dhari sadaja
Karduluk, disa-disa tatangga jugan bakal nenggu tatenggun se coma majar karces
parkir dhuwibu paneka. Nenggu final se bakal kalampa kalaban panas paneka. Sanajjan
padha tim gi’ ngodha, kalaban rata-rata omor 25,5 se amaen, tantona menta tor
emosi pamaen bakal daddi panggaliyan otama. Samoga sobung tokar, eabas dhari
parjalanan tim, ta’ kera badha tokar, se penting se nenggu bisa nahan aba’na bang-sebang.
Wasit dhalem alako tor ngadili bakal daddi tatengnger otama. Manabi oreng se
nope peluit ganeka ekarassa tembang sese dha’ sala settong tim, tanto bakal
enger ban pertandingan bisa ambu bak abit.
Pertandingan
fina paneka epangajun tello polo mennit, se biyasana molae amaen kol 15.30, are
mangken bakal emolae kol 15.00, asabab marena pertandingan bakal bannya’
lalampan, akadiya apareng tandha pangesto ka se mennang, tim se paleng bagus,
pamaen se paleng bagus, pamaen se paleng bannya’ cetak gol, tor juga pajagana
gawang se paleng parjuga. Panitia liga jugan nengngerre pola kodu badha adu
penalty, saenggana epamaju tello polo mennit.
Amaen
e lapangan cokelat, rebbana sakone’, salaen kodu padha penter, jugan kodu bisa
ngastete se kamongkinan lapangan bakal lecen, bisa bai are mangken ojan derres
(aneka’ pon rese’) makopo Karduluk saenggana asababbagi lapangan possa kalaban
aeng, sanajjan tana galis, se ka’dhimma aeng ta’ kera ngemmeng, tor jugan bakal
lecen. Kalaban badhana ojan, lapangan se aropa’agi talonna oreng se cokelat
ampon etombuwi rebba, sanajjan ta’ possa’ sa lapangan, saenggana pendha notobi
lapangan cokelatan kalaban rebba se paggun tombu sanajjan enyek-enyek. Paggun odhi’
sanajjan Eda’-didda’. Rebba.
