#Siaran ulang
Lalampan.
1444. Liga Cekeran (amaen bal ta’ asapatuwan) disa Karduluk makare settong
pertandingan antara KARTIM D (kampong Somangkaan) vs PERSIP (kampong
Palalangan). Laga bakal ekamaen are mangken kol tello’ tello polo mennit e
lapangan (talon) Somangkaan, e Lapangan cokelat (se ta’ manes), lapangan se
paleng ekasennengnge masyarakat Somangkaan. Amaen eadha’na supporterra dibi’,
tanto daddi kakowadan dibi’ dha’ KARTIM D sopaja bisa nyosol kakak kandungnga,
enggi paneka KARTIM A se pon andhi’ tiket e fase nembellas besar. Bila pon lolos (mas’) ka 16 besar, tandhana tim ganeka
pendhanan bagus. Mennang pole. bagus. Mennang pole, sajan bagus. Sampe’ final. Bagus
onggu.
KARTIM
A (se dhari kampong Somangkaan jugan) pon mastheyagi maso’ ka nembellas tim
raja samarena makala PSBR A (se dhari kampong Rengperreng) kalaban skor 3-1 e
are Jum’at Kalebun, 25 Rabiul Awal (21 Oktober) tello are se tapongkor e
Lapangan se paggun, Cokelat (ta’ manes ban ta’ neng jilad). Bila nem bellas
raja, KARTIM A bakal atemmo DENPASAR A se pon ngancor PANCASONA (Moralas)
kalaban skor 1-0. Nah, KARTIM D jugan terro arebbu’a settong tiket are mangken
(Sennen Pon, 28 Rabiul Awal/24 Oktober 2022). Soko salajana PERSIP pon badha e
nem bellas raja. Kalaban hasel apre, PERSIP pon lolos. Mon kala. Bakal daddi
mempe se juba’.
Laga
pongkasan paneka tanto bakal bannya’ oreng nenggu. Tanto bakal sella’. Banne coma
oreng Somangka’an ban Palalangan se pajat supporterra dhuwa’ tim kasebbut. Orang
dhari kampong laen jugan bakal nenggu. Sanajjan tadha’ korse patoju’anna (ja’
gun majar parkir 2000 menta’a fasilitas, ma’ gunna), sabban badha pertandingan
se paleng nantowagi, masyarakat paggun toron, dhateng kabbi, nenggu, arebbu’
neng eadha’ sopaja nengngale ka pamaenna ban ta’ kaalangan. Napa pola maenna ja’
lebur. Ta’ mabusen. Oreng se nenggu bakal manjeng. Kalaban hasel apre, PERSIP
pon maso’ ka fase 16 tim raja.
PERSIP
ta’ bakal ngenthengngagi napa pole sampe’ angga’. Sabab oreng angga’ biyasana
tapalga’. KARTIM D andhi’ gelandang ban striker se pelak, dujan berka’ ban
babaja bila eadha’na gawang. Striker se andhi’ nama Zen, aropa’agi striker se
penter nyare kennengngan, sanajjan ta’ nenggu’ bal, patot kodu jaga, me’ olle
operran manes, mon ta’ ejaga bisa nendang ka gawang. Bisa-bisa daddi gol. Tim
racegan Sidqi Lubis paneka ta’ olle bertahan terros, ta’ olle gun nante’ moso
nyerrang. Kodu nyerrang dibi’ molae wasit buru nope pluit.
Manajer
KARTIM D jugan pon ngastete dha’ permainan baringas PERSIP se lakar andhi’
kagancangan se tenggi. E pertandingan sabellunna, PERSIP amaen apre ban PERSIGA
se jat aesse pamaen senior, toa ban pon bannya’ neddha buja. Napa jebakan
offside bakal daddi peleyan kaangguy ajebbak pamaen PERSIP sopaja ta’ neng
aguli. Akadiya se amaen ban PERSIGA, pamaen adha’na seggut ta’ bisa kaloar
dhari offside.
Kasala’an
akadiya nyotho’ kalaban tanang sanajjan ta’ aora’, bakal langsung esemprit mon
wasit. Hal paneka kadaddiyan, jat polana lakar ta’ biyasa amaen. Badha teknik
khusus, kaangguy maambu pamaen moso ta’ kalaban malabu, bisa ta’ daddi kasala’an,
hal-hal kadipaneka se asababbagi bal-bal lebur. Saenggana wasit ta’ seggut nope
pluit ban maambu pertandingan. Manabi laga lako epaambu kalaban hal-hal kene’
paneka, oreng se nenggu pas busen, ban bisa mole ngadha’, ta’ sampe’ mare kanan
la mole. Ta’ lebur. Mole bai.
Eppik
ban sakanca’an bakal fokus kaangguy ajaga striker se eanggep lakar mababaja
gawang. Manabi e pertandingan sabellunna, lako maso’ jebakan offside, Sidqi
Lubis kodu maenga’ sopaja pamaen PERSIP ajar amaen taktik, saenggana bisa
nyenglae offside. KARTIM A pan-barempan are se tapongkor pendha lebur dhalem
amaen e lini pertahanan, sopaja ta’ maso’ offside.
Akadiya
pan-sanapan komentar dhari pangamat bal se toju’ e penggir lapangan, ngoca’ ja’
lini tengnga aropa’agi hal krusial, “Bila tadha’ tengngana, iya ta’ kera amaen.”
Cara ganeka oca’na sambi nyergu’ roko’na se kerreng. Settong tiket akare se
bakal erebbu’ se bakal ora’ ban pameccot sopaja amaen kalaban ora’ se ongguwan.
Ban ta’ ya-taya.
