#Siaran
Ulang PERSIGA vs PERSIP Sabellun Amaen
Lalampan.
1444. Kare salembar tiket nojju semifinal Liga Cekeran bal-balan Disa Karduluk
se bakal erebbu’ antara PERSIGA Blajud vs PERSIP Palalangan. Pertandingan bakal
ekalaksana are mangken (05 November 2022) kol 15.30 bakto Karduluk.
Epapanggiyan sabellunna, pertandingan group PERSIGA vs PERSIP ampon apanggi
kalaban skor aher apre enggi nol nol. Akaca ka ganeka, pamaen PERSIGA bakal
baringas e pertandingan paneka sopaja bisa mamaso’ bal ka adha’. Andhi’ gol
kaadha’ bakal makene’ ate pamaen PERSIP Palalangan
Pamaen
andhalan PERSIGA, nomer petto bellas, se pon oban, bakal daddi oreng se paleng
ngadha’ dhalem nyerrang, se bakal etolonge sareng pamaen nomor lema’, se
gadhuwan badan samporna (lempo). Tokang potongnga bal ganeka biyasa aberri’
ompan se nyaman, letho’ tape mon ta’ ngarte ka maenna katon eco-koco kancana.
Tanto PERSIP kodu ngastete sopaja bal ta’ maso’. Back PERSIP, nomor lema’ tanto
ta’ kera dhadha (maentheng), sopaja keeper paggun nyaman. PERSIGA sanajjan
tadha’ liga cekeran, sabban arena paggun amaen (lateyan) sopaja bila badha (lomba)
liga cekeran, sajan nyaman bila amaen. Lateyan e gir sereng Tasolong.
PERSIP
Palalangan tanto ta’ endha’ ekamaen ban daddi nan-maenan. PERSIP bakal alajjane
maenna oreng-oreng se pon pendha seppo kasebbut (nomo 17 PERSIGA pon towa).
PERSIP bakal amaen akadiya bakto amaen kalaban PSBR B se mennang 1-0. Sampe’
samangken sadaja pamaen gi’ dhalem kabadha’an sehat wal afiyat. Sobung se sake’
tor sobung se akumulasi kartu koneng. Gi’ bisa amaen kabbi, tamaso’ nomor
sapolo, kajaba nomor 11 se kalar ta’ bisa toron. Nomor petto’ pamaen PERSIP
bakal daddi pamaen se bisa aberri’ barna laen dhalem pertandingan paneka, sabab
PERSIGA pon oneng ja’ bakal badha nomer sapolo se sara paambuwanna. Nomor
petto’ se molae sabban ta’ pate etangale ja’ babaja, bakal daddi dhuri se bakal
alobange lini pertahanan PERSIGA.
Akadiya
e pertandingan sabellunna, antara BTS FC vs GAMA FC, masyarakat Blajud se pajat
semma’ ka lapangan e Somangkaan, bakal masella’ palemper panengguwan (tribun)
sopaja bisa wak-kowagan. Sopaja bisa nyokong PERSIGA. Supporter PERSIGA bakal
badha eadha’. Tanto sapaneka jugan kalaban supporter Palalangan, ta’ kera
majalan PERSIP kadibi’, kodu badha oreng se nenggu ban adukung. Oreng-oreng
bakal mamare kalakoawnna sabellun kol tello’, abajang asar pangadha’, mangkat.
Pan-barempan masyarakat bannya’ se entar bila PERSIP amaen. Tor bannya’ ollena
pesse dhari parkiran. Sella’. Tanto sella’. E 16 besar bai oreng-oreng bannya’
se nenggu, sajan arebbu’ tiket semi final.
Bannya’na
oreng se nenggu ban supporter tanto bakal daddi ora’ laen ka pamaen. Bisa amaen
kalaban bisa etenggu oreng-oreng se ekennal tantona sajan lebur tor daddi
kabunga’an monggu masyarakat. E liga antar kampong: tarkam (banne torkop),
pendukung ban supporter bisa toju’ along-polong, saleng kala’-gella’, saleng
kece, saleng koca’e namong ta’ atokaran. Bida kalaban liga elit akadiya liga
satu, se kabannya’an coma supporter tuan ruma se olle maso’. Supporter tamoy
rang-rang se bisa manyettong dhalem settong stadion. Masala tokar padha. Padha
terro atokara keya. padha kerras maenna.
E
laga penyisihan group antara PERSIP v
PERSIGA, para’ atokara. Pertandingan ambu sekitar pettong mennit polana badha
tokar colo’ antara pan-barempan oreng. Bakto ganeko, se oban (nomor petto
bellas) ngoca’ ja’ kapten PERSIP se aprovokasi. Mon eabas lebbi semma’, nomor
sapolo PERSIP (kapten) gasek epalabu tape se malabu ta’ olle kartu sakale ban
tadha’ peringatan keras dhari wasit. Tanto babaja. Wasit Madani.
Bila
PERSIP amaen e Liga Cekeran Karduluk paneka, nomor sapolo neka gasek onggu
epalabu, eddhik, esleding tekel. Bakto amaen ban KARTIM D, lebbi sapolo kale
epalabu, eparobbu e loar kotak penalty, tape wasit ta’ aberri’ kartu sakale,
entara ka kartu, maenga’ ka oreng se malabu bai tadha’. Padahal babaja. Sapa
neka jugan bakto amaen ban PSBR B, kaossa nomor 10 (PERSIP) aropa’agi se paleng
gedda’, possa’ kalaban cellot (tana), polana eparobbu epalabu. Wasit paggun ta’
aberri’ kartu sakale.
