Lalampan. 1444. Semi Final Liga Ceker
Disa Karduluk se matemmo PERSIP Palalangan VS DENPASAR A Dunggaddung. Dhuwa’
kampong pajat ake’-rangke’, apolong, sabellun pertandingan, sadaja pamaen
antara PERSIP ban DENPASAR pajat akrab sabban are, banne gun asalaman, tanda
padha ngaemba, sojapa marena amaen tadha’ tokar, tadha’ sokerran, saenggana
bila marena amaen bal, paggun saleng sapa ban asalaman. E laga sabellunna, PSDP
B ampon ngaolle tiket final samarena makala BTS FC kalaban adu penalty. Final
badhi kalampa e tanggal 15 Rabiul aher 1444 kol 15.00 (10/11). Pasera kerana se
bakal daddi Pahlawan kamennangan se laga pongkasan kasebbut.
Pertandingan are mangken se bakal
ekalampa e Gelora Somangkaan bakal ajalan kalaban anyep, panas tor baringas.
PERSIP Palalangan se ta’ bisa mamaen nomor punggung sapolo se anyama Anas,
pamaen kasebbut olle kartu mera bakto amaen ban PERSIGA se skor aher 1-1 ban
kodu adu penalty. E Pertandingan kasebbut, Keeper PERSIP daddi Pahlawan
kemenangan se bisa nyangga’ bal tendangan penalty, saenggana bal ta’ maso’ ka
gawang.
Ontongnga e pertandingan VS DENPASAR A,
PERSIP Palalangan ngaolle ora’ anyar, asabab nomor sabellas, se ta’ amaen e
laga sabellunna, pon bisa epatoron. E laga samangken, pamaen nomor sabellas,
amaen kalaban baringas, kaburu se nyeta’a gol. sanajjan seggut epalabu, eeddik,
pamaen se tenggina 167 paggun jaga, asalaman ka se malabu ban mesem. E awal
laga, panyear bal pon ngoca’, ja’ pamaen PERSIP pon maso’ ka lini pertahanan
DENPASAR A. sapaneka jugan DENPASAR A se pajat dhari pamaen-pamaen nyaman
nyerrang kalaban baringas, ta’ lempo sakale, ban ora’na akowadan. Dhuwa’ tim
saleng serrang, ta’ loppa jugan saleng alang ban saleng malabu. Tanto ta’
asangngaja se malabuwa.
Nomer petto’ dhari pamaen PERSIP, pamaen
se gesset, akernyet katon berka’ malolo, alonca’-lonca’ padhana bajing tana,
ngoja bal, olle ompan bal dhari nomer ballu’, bal ekeba dibi’, keeper DENPASAR
A kalowar dhari lebunna. Bal etandhu’ mon nomer petto’ ban maso’ ka gawang.
Keeper DENPASAR A lopot ngera bal saenggana maso’ gawang. Skor 1-0 paggun
sampe’ mare babak pertama.
Dhalem posisi kala, tanto terro keya se
mamaso’a, e babak dhuwa’, DENPASAR A nyerrang kalaban baringas. Bagiyan budhina
PERSIP Palalangan para’ kaelangan konsentrasi. Pamaen kodu gante sopaja badha
rotasi, eadha’ otaba ebudhi. Kadhuwana padhan agante pamaenna. DENPASAR A
mamaso’ Madane, se biyasana daddi wasit. Serrangan ngolpa dhari DENPASAR A,
akantha sunami taon se agilis bannya’ bungka’an. Lini pertahanan PERSIP katon
car-kalacer, konsentrasi se tenggi ban jebakan offside digunakan sopana areana
aman, wabil khusus kaangguy se gundul dhari DENPASAR A.
Pan-barempan kartu koneng kodu epakaloar
mon wasit, Bung Kus asabab bannya’na pelanggaran, sampe’ badha se nyodhuk
wasit, tanto olle kartu, kartu koneng. Pertandingan bisa eterrossagi.
Supporterra padha kondusif. Supporter e budhina gawang awak-kowagan bila
tandu’anna dhari pamaen DENPASAR A para’ maso’, ja’ para’ lambanna tange.
Pan-barempan kale DENPASAR A olle tendangan paddu (kanan ban kacer), keng gi’
pojur, pertahanan PERSIP gi’ aman.
Korang tello menit, settong pamaen
PERSIP Palalangan eanggap handball. Balla nyedding ka tanang e dhalem kotak
penalty. DENPASAR A olle rebba’an penalty. Supporter PERSIP pon garidhu, seyal,
waswas pon badha. Korang tello mennit. Pah palang. Handball. Agabay sala se
sangat babaja. Supporter DENPASAR A se badha e budhina gawang se ejaga M1EF awak-kowak
perak, sabab 99% bakal gol. Anang se bakal nandu’. Tanangnga keeper PERSIP
natthang. Peluit eteop. Bal etandu’. Ban. Bal teppa’ ka canggana gawang se
kanan.
Ta’ gol. supporter PERSIP perak.
Ca’-lonca’an. Keeper PERSIP daddi pahlawan kamennangan e laga paneka, kalaban
sombangan gol e babak pertama dhari pamain nomer petto’. Settong gol pon cokop
nyambi PERSIP maso’ final Liga Cekeran Disa Karduluk. Apanggi PSDP B.
PSDP B (dsn Daleman) VS PERSIP (dsn
Palalangan)
