Lalampan.com.
Sennen pon. 04 Jumadil Awal 1444. Aneka saestona banne bakal se aropa oreng
bine’ se daddi bakalla A, B otaba Z, namong oca’ otaba kalemat se agandhu’ arte
bakal, mesal epon bakal ngakan, sakejja’ laggi’ bakal mandhi, bakal mate. Oca’
kalaowan se bakal elakone. Manabi dhalem elmo nahwu neka badha kalemat isim,
kalemat fi’il ban kalemat horop. Oca’ bakal neka aropa’agi kalemat fi’il khusus
fi’il mudlare’ se ama’na bakal ngalakone. Akadiya oca’ tedhung daddi tedhunga.
Oca’ tedhung se olle tamba’an ‘a’ neka maksodda banne dhalem kabadha’an
tedhung, tape bakal tedhung.
Badha
oreng atanya kadhang, ba’na arapa’a (se maksodda ba’na apa elakone otaba apa
elakonana), oreng se atanya ajawab kalaban gancang “ngakana”, tandhana oreng
kasebbut bakal ngakan, aneka se ekoca’ oca’ bakal, enggi pajat banne fi’il
mudlare’ secara total. E dhalem Fi’il Mudlare’ neka bisa agandhu’ arte bakal
tor dhalem kabadha’an, akadiya tedhung tor tedhunga. Dhalem basa Madura, oca’
bakal neka sareng oca’ dhalem kabadha’an banne settong oca’. Enggi contona bisa
ekagali antara tedhung (sedang tidur)
tedhunga (akan tidur). Dhalem basa
Madura neka cokop nambai ‘a’.
Entar
daddi entara. Ngakan daddi ngakana. Atae
daddi ataeya. Saestona dhalem basa Madura neka gampang, napana pole jat
basa Madura neka basana kaula sareng ajunan sadaja. Se eguna’agi sabban are.
Sabban malem. Abasa Madura. sanajjan pon asella kalaban pan-sanapan basa, molae
basa alay, basa Indonesia basa arab ban en-laen samacemma. Ampon ekagali ta’
enggi ja’ basa Madura neka gampang. kare nambai. Nembuwi settong horop ‘a’
manabi agabaya kalemat otaba oca’ bakal.
Tantona
manabi oca’ nyamana barang (benda) akadiya jeddhing, aneka jugan etambai ‘a’,
mesal entara ka jeddhing daddi ‘ka jeddhinga’ oca’ ka agandhu’ arte entar otaba
entara, akadiya pasar, bila entara ka pasar, neka daddi “ka pasara”, sakola,
daddi asakola’a, badha se amonye ka sakola’an. Aneka padha badha rassana
bang-sebang se adaddiyagi basa Madura nyaman ekabanta sabban are sabban malem.
Para’ malemma. Para’ abana. Aneka sadajana nandha’agi ja’ bakal malem, ja’
bakal aban.
Tantona
bannya’ basa se bisa etambai a, manabi akadiya oca’ tamba, manabi bakal nambai
aneka aoba oca’ dhari tamba daddi namba’a tor epalengkap daddi namba’ana (aneka
artena akan menambah, banne mengobati), sopaja ta’ talopodan, aneka dhalem maos
tolesan sampeyan kodu ngagali, kerana basa otaba oca’ dhalem settong kaleman neka
ama’na napa, bisa andhi’ arte tamba (obat/jamo, barang se bisa mabaras) tor
tamba se andhi’ arte tamba’an (tambah). Sapena etambai polana colo’na poro.
Aneka artena, sapena eobadi polana colo’na poro. Sapena etambai, malle genna’
sapasang. Aneka artena nambai sape sesettong daddi dhuwa’an, sopaja genna’ sa
pasang.
Enggi
dhalem noles tor maos eja’an 1973 neka pajat sampeyan kodu ngagali maksot dhari
settong kalemat. Tolesan (serradan) aneka gi’ ta’ daddi dha’aran sabban are,
saenggana takerjat manabi badha kalemat otaba oca’-oca’ se tolesanna same.
Antara mandhi sareng mandi. Mandhi neka maso’ ka jeddhing tor aseram kalaban
aeng, manabi mandi neka sakte (andhi’ jurus se kalowar apoy dhari tanangnga.
Biya. Nemmowa ranta).
Abali
ka oca’ bakal se gella’, aneka pajat coma nambai ‘a’, agantong jugan oca’ napa
sabellun oca’ se bakal etambai ‘a’ kasebbut. Akadiya ta’mir masjid. Bila entara
ka ta’mir, asabab oreng Madura neka bila akandha, kadhang asella ban mandak
(meler, gaja’, bercanda), mesal bila badha oreng atanya: entara dhamma cong?
Ejawab!
Ka
ta’mira! Aneka tandhana entara ka kompolan ta’mir masjid. Sabab manabi
ekoca’agi sadaja aneka abit. Entara dhamma neka epapendha’ daddi “tar dhamma”
ban ca’-oca’ laen se ebaca kalaban pendha’. Enggi basa lakar coma tandha. Bila
coma ngakana nase’. “Dina kan nase’ bi (dina ngakan nase’ bai).
