Lebur
padha terro lebur, padha terro bunga
lebur ban bunga, terro epacampor
atempor buko dhalem sajja
sanajjan pangngara ancor
tape pengaro teddhas jembar
bannya’ oreng nyare tempor buko
sopaja daddi bukona tamba
tambana kabaringsangan
kolbas kaodhi’an ejalani rem-rarem
padha terro lebur, padha terro acabbur kajembaran
sabab panas kaposangan e tera’na
todhus ta’ andhi’ mowa
sanajjan pengaro pajat ta’ nanto
abalangngajai tempor buko
ta’ kodu ekanapso
Labbuwan Jembar, Sora 1442
Ojan
badha se aserro polana ta’ ekalamban
badha se aserro polana daddi panyekkeddan
badha se terro polana gasek akalemba’an
badha se merro polana aban-dalumban
ojan kene’ banne gunna rese’
ojan raja ta’ tanto daddi berda
ojan ban kelap, akeddhap sakedebban
ojan ban guntor, takerjat ban tabentor
ojan agili aeng, nyapcap lebat genteng
ojan daddi ba’a songay nganyo’ barakay
ojan nampes aperreyan ka bettes
ojan agenjeggan e tase’ ban edaradan
ojan notobi bumi kerreng
macengngar bungka’an ban perreng
bisa kabacco pereng
sampe’ kaodhi’an penggir sereng
kalaban ojan banya’ merdi’ tombuwan
kalaban ojan aeng atabuyan
sampe’ banjir tandhana badha kasala’an
se tasengsal dhalem kaodhi’an
Labbuwan Jembar, 1442
Oban
ngapote wa’ obanna etangale
tandhana orengnga pon towa
ngapote wa’ obanna etangale
ker-pekkeran bannya’na loppana
ngapote wa’ obanna etangale
pekkeranna bannya’ se tekkor
parembaganna bannya’ se lamor
bannya’ se tekkor
oban tombu, parembagan rombu
oban tombu, karengsa’an aganggu
oban tombu, kajembaran rebbu
oban tombu, ta’ kalaban landhu
oban aban-dalumban, arebbu’an
adduwan jang-lanjangan, gatel e bun-embunan
galiya’ monca’ e panyethagan
garu’nyeng atal-talan
embar parembagan
oban
banne sakadar O ban ban
Labbuwan Jembar, 1438
Ojang
ngalle polo kaangguy majang
seyang malem ta’ nemmo tenang
ondur dhateng paggun ta’ ontong
tape ta’ loppa paggun abajang
bila ojang ta’ nyaman moy-tamoyan
lalak pelka’ kapanasan
sanajjan ta’ kaelangan
tape agandhu’ kaposangan
ngalengsang aenter dhalam pekkeran
angen ta’ agiba kajembaran
pojur ta’ malobaran
barang-barang se pon kasandhingan
lalak, pello ngerray ta’ kapanasan
abintal-bintal abali’tangan
nape pole kadibi’an
salbi atalposan
ojang
banne o se lanjang
banne se ngolo e attas lencak dipan
bila ojang pajat malessoan
sanajjan ta’ andhi’ kakasoan
Labbuwan Jembar, 1438
Obang
kernengan otaba dalubangan
majerna’ pekkeran ban kajembaran
sanajjan lekkas eabi’ gan satobi’
nyare sara kalaban agambi’
kernengan otaba dalubangan
ngalenneng dhalem parembagan
malobang paretongan
mabikes karosagan
marosak kabagusan
paretongan aembiran
ta’ pongkas kajembaran
elang kaparduwan
aenter polana obang
abitter nyare lamban
epaenter polana ontong
etekkem kare aegem
aserro ronye’ sakone’
bila bannya’ ta’ asa’-kasa’
sakone’ ecolpe’ bannya’ eceppa’
ebangngem kalaban santa’
Labbuwan Jembar, 1437
Otang
aserro ban agentang
balikat roho, ngaronyo tolang
jamo ta’ aberri’ bellas
sanajjan ta’ daddi bellis
alako thong-tapenthong
nyare ontong daddi otang
ajudi kalaban damar kambang
ontong jau, se badha palang
otang. o-matao ka tatangga
matao berda. matao sengka
o-ma ta’ tao kantos loppa
sampe’ pekkeran ta’ dugga
otang. malekko sataretan
potong, bancang sakanca’an
otang apello ta’ abangkang
ngalelo ta’ sarmo parembagan
Labbuwan Jembar, 1437
Mat Toyu oreng Longos Gappora se paleman ka Karduluk, paneka ampon ngarang empa’ buku basa Madura, Embi’ Celleng Ji Moenentar (2016), Kerrong ka Omba’ (2019), Sokana (2020) tor Ngejung (2021). Taon 2022 gi’ sobung, coma abillai lalampan.com sopaja odhi’ ban daddi bur-leburanna oreng bannya’, tor daddi gu’-ganggu’na oreng Madura dhalem sabban arena.
