Eseram Ojan, Nompa Kartu

 

 

#SIARAN ULANG

 

Lalampan. 1444. PERSIP VS KARTIM D ampon epamaen abareng are mangken (bakto garowa) kol tello’ lebat tello pole mennit e lapangan cokelat (talon ji sapa la loppae), se badha rebbana sanajjan sakone’. E pertandingan paneka, ondhem celleng ban guntor (galuduk) pon aponye molae kol settong seang. Cokop garimeng ngedhing monyena guntor se kadhang asella ban kakeddhabba. Sanajjan guntor ban kelap, PERSIP KARIM D paggun amaen. Dhuwa’ tim kasebbut ta’ keddhi’ sakale. Dhuwa’ supporet (PERSIP KARTIM D) padha wak-kowagan. Baruwak lakar.

 

Babak settong, KARTIM D ngowasae lapangan ban bal, pamaen PERSIP katon bingung. Kalaban badan raja, tenggi ban aora’ raja, KARTIM D se dhateng kalaban kaos jersey barna  pote (padhana KARTIM A) gasek nekkan lebat kangan kacer se lakar mababaja ka lini benteng PERSIP Palalangan. Pamaen PERSIP pendha seggut epalabu, nomer sapolo daddi pamaen se paleng seggut esemma’e ban epalabu. Nomer sapolo kasebbut, se andhi’ gaya maen se lakar aliyu’-liyu’, sara paambuwanna, lakar babaja mon ta’ ekacar balla. Sajan malem, ondhem tolos dhateng anaonge pertandingan.

 

Asabab gasek pelanggaran (alako sala) ka pamaen PERSIP, dhuwa’ kartu koneng ngombar dhari kapengnga wasit tor ekarebba ka pamaenna KARTIM D se lo’-molo’ lako malabu pamaen. Kartu kasebbut pon baktona epakalowar, asabab pon dhukale ngaolle tandha pangrenget dhari al-mukarrom wasit Madani. Se pajat tegges, dhalem ngadili pertandingan-pertandingan se panas ban babaja. Babak settong, PERSIP katon ta’ neng aguli, katon ta’ olle, ta’ bisa nendang ka gawang balekkadan napa pole sampe’ loros ka gawang. Pamaen PERSIP badha se kodu eosong kalowar, asabab katon roga ban kodu gante. Babak settong tadha’ gol sakale.

 

Rese’ pon molae nyapcap gan sabigi. Ojan pon nyoro oreng kaangguy ngaop. Epenggir lapangan oreng kare sakone’. Pamaen ngedingngagi intruksi dhari pelatih dhalem kabadha’an ojan. Nyamana bai liga ceker, poko’ badha lapanganna, maske tadha’ ruang ganti, ta’ masala, la poko’ ja’ atokaran. Ojan derres. Abali ka tengnga lapangan kaangguy amaen pole, bagian kacer pertahanan KARTIM D possa’ kalaban aeng. Akerrem. Tanto aengnga cokelat (keng ja’ enom banne kope sasetan). Sajan bacca. Sajan lecen. Ngacelepper. Bannya’ pamaen se labu pang-takarpang polana lecen, napa pole jat ta’ asepatuwan. Sadaja oreng se nenggu ngaop. Tadha’ komentator otaba penyiar. Ngaop keya. Toa ta’ amonye keya. kaojanan.

 

Dhalem kabadha’an lecen, bacca ban ojan, dhuwa’ tim se amaen padha nyare kasempadan kaangguy mamaso’ bal, sopaja mennang. PERSIP katon amaen kalaban baringas, namon gi’ ngastete, tako’ nyaman nyerrang, pas loppae ka lini pertahanan. Nomor sapolo PERSIP gi’ daddi oreng se lako ejaga sopaja ta’ bisa aguli ban ta’ bisa nendang. Gi tadha’ gol.

 

Bakto ojan molae terrang, bagiyan paddu morlao’ aengnga ta’ agili kalowar. Nettep. Oreng se nenggu, se majar karces lebat parkir (2000) molae toron pole ka seddi’na lapangan. Pon ta’ ngaop pole. dhuwa’ tim se amaen paggun rebbu’an bal sopaja bisa mamaso’ ka gawangnga mosona. Bila bal lebat (kalowar dhari garis) kodu ebateg-agi ka dhalem kalaban tanang. Baktona KARTIM A ngontallagi bal ka dhalem. Bal gi’ erebbu’ e tengnga. Bal buru ka dhaja, ngalto’ pole ka lao’. Zigzag. Nomer sapolo nyoba’ ngaot bal kalaban sokona dibi’. Etendangan dhari tengnga lapangan. Bal santa’ ta’ bisa esangga’ kalaban dhammang. Bal manta’ ban maso’ ka gawangnga dibi’. Gol. gol apate dibi’. PERSIP andhi’ settong gol. tanto supporter PERSIP bunga.

 

Kala settong, KARTIM D sajan baringas. Bakto keeper nendang langsung eara’agi ka gawangnga PERSIP saenggana bal coma bisa ekamaen sareng dhuwa’ keeper. Nyaman keya. otaba bila pon offside. Kabara’ offside. Katemor offside. Offside pajat cara sopaja oreng ta’ bisa buru. Sabban are rowa pass. Tadha’ cara pole cora’na. Kalaban mennangnga PERSIP 1-0 dha’ KARTIM D, PERSIP maso’ 16 raja.

 

Aneka aropa’agi 16 tim se ampon andhi’ tiket: Berruh FC A (Berruh), Gama FC (Madak), BTS FC (Blajud), Galis B (Galis), PSDP B (Daleman), Denpasar B (Dunggaddung), PSDP A (Daleman), Persedu (Dunggaddung), Kartim A (Somangkaan), Denpasar A (Dunggaddung), Logos (Rengperreng), PSBR B (Berruh), Persip (Palalangan), Persiga (Blajud) Rekareh FC (Somangkaan). Ngereng amaen (bertanding) kalaban sportif. Kala’ biyasana ta’ usa ngoso’an ban ta’ usa atokaran. Gi’ padha Karduluk. Gi’ padha na’ poto Adam.