#Siaran
ulang PERSIP-PERSIGA 1-1.
Lalampan.
1444. Pertandingan se pon sajan kare sakone’, enggi kare ballung tim se maso’.
Are mangken, PERSIP Palalangan apanggi pole kalaban PERSIGA Blajud, se
ka’dhimma aropa’agi tim dhari settong group. Dhalem pertandingan paneka badha
dhuwa’ kartu koneng tor settong kartu mera. Laga se panas paneka, banne coma
pamaen se atokara, namong jugan se nenggu pon maso’ ka lapangan. Polisi kodu
toron ban matennang kabadha’an. Saenggana bisa kondusif pole. Pertandingan
paggun elanjut. Marenges lakar.
Pertandingan
epaterros. PERSIGA pon andhi’ skor 1-0 pon e babak pertama dhari sokona nomor
petto’ se pajat nyaman tendanganna. Lini pertahanan PERSIP katon ta’ sanggup
ajaga sopaja tadha’ gol, namong palang ta’ kenneng pellang. Sobung gol pole
sampe’ babak pertama mare. Supporter PERSIP katon kacep. Bakto istirahat,
pamaen ngedingngagi arahan manajer sopaja bisa agabay gol e babak kedua. Ta’
olle ngalakone sala, ajauhi laranganna amaen bal, akadiya neppak ban laen
samacemma. PERSIP terro mennanga keya. ba padha!
Wasit
Madane pon nope pluit eparanyeng. Sadaja pamaen pas nyander ka tengnga tor
nempati posisi se karaddu ka aba’na. PERSIP nyerrang ka temor, PERSIGA nyerrang
ka bara’. E mennit pertama babak kapeng dhuwa’, PERSIP maebir tendangan, tape
gi teppa’ ka back budhina PERSIGA. Tummul. Nomer sapolo ngoper balk a nomer
ballu, Anas nyaleot, narema ompan dhari rahem, pas etambu back PERSIGA. Anas
alonca’. Tanto kodu magaggar aba’na ka tana. Anas ta’ kera ngabber terrosan.
Bakto toron ka bume se cokelat, anas taenyek ka bettes, tanto ta’ esangngaja,
se la bariya Anas gi’ etandhu’ dhadhanya. Back PERSIGA se nyapowe bal kalaban
sokona, langsung jaga, Anas ekarobung padha mokola. Agarebbung. Para’ atokara.
Oreng-oreng pon padha maso’ ka lapangan. Panas. Tape pojur gi ta’ atokar. Anas
ban Syauqi padha olle kartu koneng.
Lebur
nyerang polana terro nyeta’ gol, PERSIP para’ kamaso’ana bal pole. kare
saparapat mennit, PERSIP paggun ta’ ambu nyerrang. Dhalem kabadha’an kala ban
terro mennanga, Anas neppak bal kalaban tanangnga. Tanto olle kartu koneng
pole. bila pon olle dhuwa’ kartu koneng, pamaen kasebbut bakal langsung olle
kartu mera. Bila pon olle kartu mera, pamaen kasebut kodu kalowar dhari
lapangan, bisa mandhi ka adha’, otaba ekeba melle bakso gallu. Dhalem
kabadha’an kala tor nyare cara sopaja bisa nyeta’ gol, PERSIP kodu kaelangan
settong pamaenna.
Dhalem
kabadha’an kala ban kaelangan settong pamaen andhalanna, PERSIP Palalangan ta’
bu-ambu nyerrang pettong are pettong malem. Pojur salamet. Para’ gol pole dhari
PERSIGA. Ngongodhadan Palalangan katon kaelangan rasa sake’ ban lesson.
Paburuna pamaen PERSIP akadiya omba’ segi tiga Bermuda se ngantem tembok bato
solong e gir sereng Blajud. Pan-barempan kale, sondhulan, tendangan, tandhu’an
dari pamaen PERSIP gi’ lebat e loar gawang. Nomer dhulekor, petto’ ban ballu’
padhana bala’ taon se ngoser paburuna. E mennit tello lekor, Rahem, nomer ballu
olle bal manta’ dhari buwangan, bal esondhul ka budhi. Bakto ganeko keeper
PERSIGA maju sakone’, saengga ta’ dugga bal se melambung eattasanna. Gol. 1-1.
Gol kasebbut tanto apareng kajembaran ban kabunga’an monggu supporter PERSIP
Palalangan.
Para’
badha tokar pole polana supporter PERSIP eanggep maso’ lapangan tor esoro
nyorodan polana semma’ ka garis, namong se ra’-manggera’ padha ekenneng teggu’,
saenggana sobung tokar. Polisi pon manjeng, tor nyoro sopaja kalowar dhari
lapangan. Pertandingan epaterros. Tanto pertandingan sajan lebur. Garidhu. Mon
tolos après. 1-1 kodu adu penalty. Marenges.
Dhalem
kabadha’an apre, PERSIP ta’ bu-ambu nyerrang sopaja bisa nambai gol. PERSIP
nyerrang total. Coma adina settong dhuwa’ back ban settong keeper ngodha se pon
bannya’ abi’na ka buja. Bakto kare sakone’, PERSIGA katon ta’ neng akelbu’
sakale. Polana apre 1-1. Adu penalty. Tendangan se lu-dullu dhari pamaen
PERSIGA, nomer 17 ta’ maso’. Tendangan pertama dhari pamaen PERSIP maso’. 1-0.
Badha se ngoca’ ta’ gol ban laen samacemma. padahal bal maso’ tor teppa’
(nambu) cangga se budhi. Pan-barempan kale tendangan PERSIGA ta’ maso’. Kare
ngantos tendangan dhi-budhi dhari nomor dhulekor. Mon maso’ mennang. Mon ta’
maso’, adu penalty pole dhu penendang laggi’. Tendangan nomer 22 maso’. PERSIP
mennang. Kalaban mennang. PERSIP bakal amaen kalaban DENPASAR A
4
tim e semifinal
BTS
FC Blajud
PSDP
B Daleman
DENPASAR
A Dunggaddung
PERSIP
Palalangan
