Sanja'na Irman Hermawan

 

Sanja'na Irman Hermawan
sf: pixabay

 Janji E Paseser

 

e bibirra tase' dika ajanji dha' bula: janji se tabareng gulungnga omba'

e bakto amaen aeng tase' nyangke' aksara nyamana dhalem taresna.

 

dhuh, Ale'

ta' nyangka taresna se etamen nombuwagi loka se dhalem

gi' enga' bula dha' janjina

janji se kalowar dhari poncana ladding se nyocco dhalem ate.

 

Legung, 2022

 

Ngabas Salerana

 

e dhalem pettengnga malem sonarra bulan;

aropa dika

aba' ta' ngataowe keya ja' dika bulan dhalem pettengnga ate: se ekataowe aba' coma dika panyamporna sakobengnga sokma

teptep kembang banynya'na aeng kalaban aba' kagabay baca

e dhalem nganggi' aksara ta' akare mansen e bulpen: ta' potos nyareta'agi dha' seppe

ngarep bannya' dika dhatengnga dhalem mempe-mempe.

 

Legung, 2022

Careta Dhalem Cethak

 

oca'na  taresna paggun cekka' e dhalem cethak

akantha mabar salokke' daddi songay nyomber loka

aba' ta' ngarte ban ta' pasthe

 

dhuh Guste

dusa napa se ekagabay bila coba

amalan napa se ebaca bila ni’mat

 

dhuh Guste

lebur onggu dunynya

lebur onggu kalaban loka.

 

Legung, 2022

 

Empa' Oca' Dhalem Pekker

 

Empa' oca' dhalem pekker pamolena sokma

ban kasalameddan

nyettonga dhalem ate: nyampowagi roh kalaban pasthe

oca' paggun cekka'

e seppena eajag acator ban taretanna

e dhalem posangnga etaja'  ban eaja’ dha' jalanna aba'

nyettonga onggu pekker aba'

dhalem mempe selaen alamma.

 

Legung, 2022

 

Din Aju

 

Din aju nyopre malathe seddha' manes totorra

kembang e taman amandi dhalem kaasreyanna,

akantha bidhadhari toron dhari mandhapa.

 

bula ta' nyangka; dhatengnga bulan dhalem socana ngocernang masenneng ate

 

dhuh Din Aju

satengnga onggu kasamporna'an dunynya.

 

Legung, 2022

 

Irman Hermawan, Laher e Songennep 15 Oktober 2003, neng-neng e disa Legung Temor, mored e MA LUGHATUL ISLAMIYAH. Buku puisina akompol dhalem ( DARI PANTI KU KEJAR MATAHARI)

Posting Komentar

Lebih baru Lebih lama