Lesbumi Sumenep Ngalampa Festival Sapparan Budaya



Lalampan-2022. Lembaga Seni Budaya Muslimin Indonesia (Lesbumi) Pimpinan Cabang Nahdlatul Ulama (PCNU) Sumenep ngalampa’agi Festival Sapparan Budaya kalaban tema “Merawat Kearifan Lokal” se esaba’ e gedung Islamic Centre Bindara Saod Batowan Songennep. Festival ka’dhinto ekabidi dhari are Satto (Malem Ahad molae salastarena isya’) tanggal Salekor (Malem 21) Sappar 1444 (17 September 2022), saenggana esebbut kalaban Festival Sapparan Budaya, acara ka’dhinto sampe tanggal 23 Sappar 1444 (19 September 2022). Festival ka’dhinto ekabidi dhari malem ahad, ka’dhinto ampon maso’ tanggal (malem) salekor, saenggana esebbut malem Salekoran. Malem Salekoran menangka lalampan rutin Lesbumi se pajat epabadha e sabban tanggal malem salekor (21).

E malem Ahad (21 Sappar 1444) acara ebukka’ kalaban pandu’a sopaja lalampan Festival Sapparan Budaya kalampa kalaban lancar tor ta’ manggi aral se ngoba jalanna lalampan. E malem ahad kasebbut bannya’ se rabu, asabab badha kompolan pojiyan se rabu kalaban rombongan, jugan perwakilan dhari PCNU Sumenep, Perwakilan dhari Bupati Sumenep, Perwakilan dhari Gubernur Jaba Temor. Macapat Kalennengan daddi panglepor dhalem malem pamokka’ kasebbut se ka’dhimma macapat kasebbut daddi kajembaran tor kabunga’an monggu Kang Jadul Maula se rabu dhari Yogyakarta.

Neng Inayah Wulandari, potre epon Gus Dur jugan rabu, apareng tandha pangesto tor ajarbaba’agi kadinapa abangun tor ngodhi’i kabuddhaja’an, akadiya ebu’-ebu’ se paggun adungngeng monggu potra-potrena sabellun tedhung.

Are Ahad, dhalem seminar Budaya “NU & Multikultur-Art” salaen erabuwi Kang Jadul Maula, jugan rabu enggi ka’dhinto Pak Halim HD se aropa’agi Ahli pertunjukan seni Tradisi dhari Jaba, kalaban moderator Mashur Abadi. Dhalem acara seminar kasebut, Kang Jadul sareng Pak Halim HD maemot ja’ multikultur paneka banne masala dhari bangsa Indonesia se pajat ampon beragam tor badha dhalem naungan Bhinneka Tunggal Ika, bangsa Indonesa ampon odhi’ dhalem bangsa-bangsa tor suku-suku se en-laenan dhari Sabang kantos Merauke.

Malem Sennen aesse kalaban cem-macemma tabbuwan/tatenggun molae dhari Bha’ Garbis, (musik) La Ngetnik aka Rifand Khoridi, perjalanan DEWOKUSTIK dalam menembus ruang dan waktu, tor sadaja seniman, sastrawan se maos puisi. Are Sennen aesse seminar sastra kalaban marabu kiai Faizi, Mashuri Alhamdulillah, Nonot Sukrasmono tor Chrisman Hadi kalaban moderator Matroni Muserang, tema seminar ka’dhinto enggi paneka Sastra Santri dan Hibriditas Budaya. E malem Salasa, dhalem panotoban Festival Sapparan Budaya aesse kalaban musik Gambus, pamaosan sanja’ tor tari sufi.

Dhalem Festival Sapparan Budaya ka’dhinto juga badha pameran lukisan, pameran batik, pameran kerres dhari Aeng Tongtong tor jugan bazar buku basa sastra Madura. Dhalem lalampan paneka, rabu para seniman Sumenep, akadiya Amin Bashiri, Khalil Tirta, Aliman Taka, Sugat Ibnu Ali. Pelukis tamarsareseh, Lukman Hakim A.g, Maniro AF (se ngorenge Arsip Puisi Madura), ketua DKS Kiai Turmidi Jaka. 

Dhari komunitas tor sanggar jugan bannya' se rabu, molae dhari sangar Gendewa, Sanggar Cemara, Komunitas Kalenteng, jugan perwakilan dhari GP Ansor Sumenep, Fatayat Muslimat IPNU-IPPNU. 

Mela dhari paneka acara Festival Sapparan Budaya patot tor parjuga, saenggana Ketua Dewan Kesenian Sumenep ngajak sopaja bila badha Sapparan pole bisa kolaborasi tor agutong rojung.

Posting Komentar

Lebih baru Lebih lama