Ranca' Bungkana Lako Jakarta'an

sf: Helmy Khan

Salam pamokka'. Tolesan paneka karacek kalaban basa se sederhana, jau dhari oca' samporna, amarga kamampuwanna aba' se akadiya terro agellu'a gunung se raja namong tanang ta' nogga.
_________

Ampon bannya' kana' ngodha khusus epon se dhari Madura mangkat ngone'e rizki ka pan-barampan tempat akadiya Jakarta, Jogja, Sorbaja, Bali ban kottha se laen se ampon ta' kabitong bannya'na.

Mela dhari paneka, saestona ka' dhinto aropa'agi settong pangajaran nojju dha' ka kadhibasa'an tor nyonjung kapartaja'an saamponna aba'na ongga ka tingkat omor se lebbi dibasa.

Dhalem arteyan ka' dhinto, badan kaula ngala' oca' se rengkes, se ka' dhimma oca' dibasa gella' ta' bisa earte'e kalaban towa omorra.

Namong aropa'agi kamampuwanna aba' dhalem aguna'agi pekkeran se jarna' kaangguy motossagi otaba ngala' settong tengka dhalem masepa' parkara se laen.

Karana dhalem hal ka' dhinto, banne ta' bannya' masyarakat se ngagunge omor towa tape ta' bisa eyajag marampak settong parembagan.

Tor sabalig epon, kadhang badha kana' ngodha tape mapan dhalemmmanna nata otaba maloros settong parkara. Akadiya ca'-oca'an, cabbi lete' masse kene' peddhissa makomor colo', bida ban cabbi raja se gun bisa gabay na'-genna'na kowa pathe. Melana dhari hal ka' dhinto, hal paneka se e kamaksod dhalem arteyan pendha' tolesan rengkes badhan kaula. 

Tanto, rambu mera dhari tolesan paneka manabi ta' etalektegi pole katon ta' nemmo maksod se juntrong antara essena tolesan ban pembahasan 'lako jakartaan ban kadhibasaan'.

Sanyatana kapaneka, dhalem kacamata badan kaula, oreng se mangkat alako ka settong tempat akadiya Jakarta otaba Sorbaja mesal epon, ka' dhinto ngagunge tello' tanggung jawab se sanget berra'. 

Se tello' tanggung jawab e attas gella' kodu etale'e kalaban sekken tor egandhu' gabay pajimadan, tantona kodu ebirji' pole kalaban akal sehat tor pekkeran se jarna'.

Dineng ranca' se tello' parkara, se pertama aropa'agi tanggung jawab dhalemmmanna ajaga aba'. Se kapeng dhuwa' tanggung jawab ajaga essena barung otaba dagangan, tor se keng-bingkeng enggi paneka tanggung jawab dhalem ajaga kapartaja'an.

• Kasalameddan 

Dhalem pembahasan ka' dhinto, aponapa badan kaula ma' nyebbut kasalameddanna aba' se langkong otama? Hal paneka tanto ta' nyengla dhari bungkana tanggung jawab se dhuwa' laenna se dhalem tapseranna badan kaula bakal ngalotor manabi kasalameddan ta' e otama'agi.

Tanto ta' padha baramma kaodhi'an, babatek, tor karokonan se kadi ponapa se cocok neng tempat kalakowan bang-sebang.

Samesal ajaga kasabbaranna aba' dhalemmmanna alayane para pembeli se dhang-kadhang malentos sanajjanna etotore kalaban oca' se alos. 

Otaba sabbar narema kalaban rassa se paleng ikhlas manabi badha settong atoba dhuwa' pembeli se kakorangan obang lema ratos otaba saebu ropeya.

Tor ta' kalebat jugan sabbar tor bibika ngadhebbi preman otaba oreng se nyare masalah kaangguy arosag barung se daddi tanggung jawabba aba' sa ampon epasra'agi sareng jaragan.

Kaangguy marejang conto se e attas paneka buto dha' kasiyapanna aba' dhalem ngadhebbi pan-barampan masalah saamponna aba' jau dhari oreng seppo, taretan, bala tangga, ban oreng-oreng se bisa egandhunge ka angguy menta tolong. 

Tanto ta' kera burung atokar sareng preman otaba epon akareggingan ban pembeli manabi hal paneka ekala' kalaban ate rowet ban sompek. Namong hal ka' dhinto bisa erendhai kalaban enga'na aba' dha' tanggung jawab dhalemmmanna nyare kasab ban nyokopi kabutowanna ana'--bine otaba oreng seppo se ampon odur.

Saenggana dhalem hal ka' dhinto badan kaula ngagunge anggebban, manabi hal paneka ekala' sabbar tanto kasalameddan bakal ngombar.

• Tanggung jawab ajaga essena barung

Ranca' se saterros epon enggi paneka aropa'agi tanggung jawab ajaga essena barung otaba dhagangan.

Ajaga barang dhagangan sanget berra'. Buto kakowadan fisik dhalem ngadhebbi lempo ban lesso tor pekkeran se pekka dhalemmmanna ngapallagi argana barang dhari settong ka settongga. 

Karana manabi sampe' rosak otaba tekkor dhari bitongan, tanto banne kaontongan pole se ekaolle, namong rasanna tatangga daddi sakampong abirji' kapalanganna aba' se badha e tana rantau.

Salaenna ngaberra' essena barung ma' le ta' tekkor, jugan ta' kalah marengso ka badan ban pekkeran enggi paneka katetesanna aba' dhalem nantowagi argana barang dhari settong ka settongga.

Hal paneka jugan nantowagi kaperna'anna para pembeli ma'le ta' nyengla ka toko laen gun coma alasan bidana arga. Bida arga lema ratos otaba sampe' saebu, apangaro raja dha' para pembeli. Bisa-bisa ta' andhi' pelanggan tetap. 

• Kapartaja'an 

Samasthena se nomer tello' paneka ta' addhu ekoca'agi ranca' pole, namong langkong sae manabi esebbut kalaban buwana ka ngasteteyanna aba'. 

Karana settong alasan ka angguy magampang pembahasan, saenggana badan kaula asajja nyebbut kalaban oca' "ranca'".

Saamponna se dhuwa' ranca' se aropa'agi kasalameddan ban tanggung jawab ajaga essena barung etontassagi kalaban hasel se mapan, tanto kapartaja'anna jaragan noro' bunte' ka angguy masra'agiya barungnga pole ta' kera buto pekkeran se lanjang ka angguy ngaolle kapotosan.

Tantona kapartaja'an laen samesal rasanna tatangga ta' kera ngacaca kajuba'anna aba', tape bakal arasanan ka ontongan ban ka bajjra'an sa abidda badha e tana rantau.

Dhari hal ka' dhinto, sakone' bannya' proses kadibasa'an bakal ekaolle dhari sabab jau dhari oreng seppo, bala tangga, ban oreng-oreng se bisa egandunge ka angguy menta tolong dhalem nontassagi settong masalah.

Emot dha' ka se tello' ranca' gella', ja' hal paneka bisa ekaolle kalaban ka ngasteteyan, pekkeran se mapan, sareng kasalameddan se ta' kakorangan.
_________

Melle kokot ka pasar Candi
Tajin arta' nyaman gulai
Banne maksot aba' ngajari
Tape mon lopot tore balai. (*)


Helmy Khan, asli oreng Banuaju Bara', Tang-Batang, Songennep. Perna asakola e Taufiqur Rahman Longos, nyantre e PP. Sabilul Muttaqin tor matontas pendidikan e perguruan tinggi INKADHA Sumenep Madura. 

Kalakowanna ekala' santai, aba'na lebur noles careta pandha' tor sanja'. Kabitong sabagiyan tolesanna ampon tayang e media cetak ban online.

Posting Komentar

Lebih baru Lebih lama