Parjalanan Sastra Toles Basa Madura


Sastra Toles Basa Madura (STBM) odhi’, badha keng ta’ jurbo. Kantos mangken ampon banya’ media online akadiya website se asadhiya narema tolesan basa Madura, molae dhari sastra, gancaran tor laen samacemma. namong tantona banne coma media online se narema tolesan basa Madura, sabellun ka’dhinto ampon badha Buletin Pakem Maddhu, Koran Radar Madura, Majalla Jokotole, jugan nyosol jatimkini.id, sinergi, tor pola bakal nyelbi’ media laen se siap asadhiya taneyan sopaja bisa narema tolesan akadiya Lalampan paneka.

Buletin Pakem Maddhu (BPM) ngombar dhukale dhalem sataon, asalla BPM aniyat terro ngombara (em)pa’ kale dhalem sataon, namong karana sakone’ tor serredda naska, aher epon coma bisa ngombar dhukale dhalem sataon. Kantos mangken, BPM se eseppowe sareng M. Hafid Effendy terros ngantos naska dhari masyarakat Madura. sasaran epon BPM paneka menangka ru-guru SD/MI, MTs/SMP, MA/SMA tor mahasiswa. kantos mangken coma bisa terbit 750 oplah. BPM ka’dhinto aropa’agi potraepon Yayasan Pakem Maddhu, se ka’dhimma badhana yayasan kasebbut, sopaja bisa ajaga, arabat tor meyara tolesan basa Madura. Yayasan paneka badha dhalem naongan pamarenta Kabupaten Pamekasan (Eracek dhari somber Radar Madura. eccaban, Ahad 21 Februari 2021).

Majalla Jokotolè (MJ) ngombar dhukale dhalem sataon. Taon 2022 semester pertama ampon maso’ eccaban kapeng 26 enggi paneka eccaban Januari—Juni, Juli—Desember 2022 aropa’agi eccaban kapeng 27. Majalla paneka ngombar sajjegga taon 2008 kalaban neyat sopaja bisa meyara basa Madura lebat tolesan. Dhalem MJ paneka aesse carpan, sanja’, salera, sae eber, pokeddan, lakon, Lalampa’an, jar-kalenjar. Majalla Jokotolè paneka dhalem naongan Balai Bahasa Provinsi Jaba Temor se pajat kalanjangan tangan dhari Badan Bahasa Indonesia se badha dhalem naongan Kementrian Pendidikan, Kebudayaan Riset dan Tekhnologi.

Radar Madura aropa’agi media massa Koran se pajat ngombar sabban are. Radar Madura paneka aropa’agi bagiyan dhari Jawa Pos Group. Monggu sastra Madura, Sanja’ tor Carpan (puisi dan cerpen) ngombar sabban are ahad (minggu), otama epon molae tanggal 15 Juli 2015 kalaban carpan pamokka’ enggi paneka “Embi’ Celleng Ji Monentar” se langkong daddi judul antologi carpan “Embi’ Celleng Ji Monentar” karangan epon M. Toyu Aradana (Mat Toyu samangken). 

Kalaban badhana Radar Madura paneka bannya’ babbar pangaran buku basa Madura, molae dhari Mat Toyu kalaban empa’ bukuna, Embi’ Celleng Ji Monentar (2016, Halaman Indonesia), Kerrong ka Omba’ (2019, Sulur Pustaka), Sokana (2020, Komamedia-APM), Ngejung (2021, Sulur Pustaka) 
Bin (N Shalihin Damiri) kalaban bukuna se abul-ombul Lanceng Talpos (2020, Divapress) tor jugan Salbut (2021, Divapress) badha jugan Zainal Abidin Hanafi kalaban Esarepo Bencong (2017, Halaman Indonesia) tor Bajing Tana (2020 Halaman Indonesia), ta’ katinggalan jugan, Pimred Radar Madura se pajat menangka kaca, se ampon ngabidi kantos awal nerbittagi buku “Sagara Aeng Mata Ojan (2008, BBS) enggi paneka karangan epon Lukman Hakim AG. Taon 2017 Lukman nerbittagi pole buku antologi sanja’ kalaban ombul buku Cengkal Burung (2017, Sulur Pustaka), Oreng-oreng Palang (2018, Sulur Pustaka), Sagara Aeng Mata Ojan eterbittagi pole asareng Tang Bine Majembar Ate (2020, Sulur Pustaka). Se paleng anom enggi paneka Khalil Satta Èlman kalaban bukuna Serrat Artate, ngombar taon 2021.

Radar Madura jugan nerbittagi buku TORA Satengkes Carpan Madura, se aropa’agi kompolan carpan se ampon ngombar dhari 15 Juli 2015 kantos akher 2016 saengga sabidak tello’ carpan takompol langkong salekor pagarang, buku paneka ngombar e taon 2017. Taon kasebbut jugan badha buku “Èghirrep Sètan” karangan epon Supriyadi Afandi lebat Pelangi Sastra. Jau sabellun paneka, badha buku Nemor Kara se ngombar lebat BBS otaba Balai Bahasa Sorbaja se samangken ampon daddi BBJT otaba Balai Bahasa Jaba Temor e taon 2006. 2010, ngongodhadan Komunitas Pelar STITA Sumenep mangombar buku “Lanceng Paraban Ganja.” E taon 2013, BBS mangombar buku pole karangan epon Yayan Ks se aropa Kèjhung Aghung tor Puisi Jhâpa Ghrânyeng. Buku basa Madura “Jhimat” ngombar dhari Disbudporpora Songennep e taon 2014. Tor pan-saponapan buku se badan kaula ta’ dugga.

Kantos taon mangken (2022) Sastra Madura ampon tello kale ngaolle tandha pangesto dhari Yayasan Kebudayaan Rancagè enggi ka’dhinto Kerrong ka Omba’ (Mat Toyu, 2019 Sulur Pustaka), Sagara Aeng Mata Ojan (Lukman Hakim AG, 2020) tor buku Ngejung (2021, Sulur Pustaka). Carpan-carpan Mat Toyu se badha dhalem buku kasebbut ampon ngombar e Radar Madura, Majalla Jokotole tor Sinergi (settong carpan).

Buku-buku se ampon ngombar
Nemor Kara (2006)
Sagara Aeng Mata Ojan (2008)
Puisi Jhâpa Ghrâny (2013)
Kèjhung Aghung (2013)
Jhimat (2014)
Embi’ Celleng Ji Monentar (2016)
TORA Satengkes Carpan Madura (2017
Cengkal Burung (2017)
Èghirrep Sètan (2017)
Èsarèpo Bèncong (2017)
Oreng-Oreng Palang (2018)
Kerrong ka Omba’ (2019)
Sagara Aeng Mata Ojan (2020 terbit pole)
Tang Bine Majembar Ate (2020)
Lanceng Talpos (2020)
Bâjing Tana (2020)
Sokana (2020)
Salbut (2021)
Serrat Artate (2021)
Ngejung (2021)


Tolesan paneka eracek dhari pan-saponapan somber akadi Radar Madura serradan Lukman Hakim AG tor Jokotole, tor jugan sapangaonengan badan kaula sanajjan sakone'.

Posting Komentar

Lebih baru Lebih lama