Alhamdulilla, ACC ban Ujian Skripsi

sf: Dokumentasi stidar.ac.id

Samangken lampu ampon odhi’ normal pole, ta’ padam akadiya se kadaddiyan dhalem saminggu neka. Mate, odhi’, mate, sampe’ bannya’ perrena, nyapo’ ka rang-sabarang, bannya’ oreng aberruy polana ta’ bisa atana’, ta’ bisa nyassa kalaban messin nyuci, ta’ bisa ngecas laptop ban hp. Ban sala settongnga jugan enggi paneka aperreyan ka skripsina mahasiswa STIDAR se ampon para’ mareya.
Maso’ pokol 20:58 tanggal dhuwa’ bulan maret, mahasiswa kasebbut nyamana atoles kalaban horof arab “jim ya’ lam alif nun ya’” apareng oneng ja’ tolesan skripsina elang asabab ta’ sempat nyempen (save) balekkadan pas lampu padam

“,.. mati nya aliran listrik membuat data yang di hasilkan hilang entah kemana. Inilah hasilnya jika kenyataan tidak sesuai ekspektasi, bingung, kecewa dan bahkan depresi” oca’na. namong mahasiswa kasebbut odhar. Paggun etoles pole. Asabab tanggal 09 Maret 2022 aropa’agi ujian Skripsi. Kalaban semangat abillai tor abalangngaja, Mahasiswa BKI kasebbut ngoca’ “Alhamdulillah” saamponna bisa afoto areng-sareng kalaban penguji skripsi pokol dhuwa’an seyang. Kalaban seragam almamater STIDAR, songko’ celleng tor celana celleng, lanceng kasebbut maebir mesem tor empolla dha’ kamera sopaja ekala gambarra.

“Bakto ganeka kaula rekong, tako’ ta’ bisa noro’ ujian. Sabab noles sara. Napa pole jau kaula se entara bimbingan. Samangken enggi ampon tenang, perak, asabab pon lulus, maske kodu revisi dhalemmanna minggu paneka.” Oca’na bakto marena ujian.

Lanceng se gi’ mondhuk tor ngabdi neka pajat bajeng tor semangat kaangguy duli mare tor lulus, sopaja reng seppo dhuwa’na bunga.
“Enggi, tantona asabab du’ana reng seppo dhuwa’, se katon ta’ usa penta neka. Daddi kaula semangat onggu se malastareya skripsi paneka.” Oca’na pole.

Metorot Panitia Skripsi, Khamsil Laili notorragi ja’ mahasiswa presentasi kalaban parjuga, samporna tor mengesankan.

“Alhamdulillah, mahasiswa semangat, dhalem menyampaikan presentasi cukup mengesankan. Tantona kaula perak, sanajjan ta’ noro’ mangken sadaja. Asabab gi’ kare sanapa mahasiswa se ta’ lastare skripsina, saenggana ta’ bisa noro’ ujian are mangken.” Dhabuna Khamsil Laili lastarena ujian. Badha petto bellas mahasiswa se ta’ lastare skripsina saenggana ta’ bisa noro’ ujian gelombang pertama paneka.

Parlo ekagali, STIDAR aropa’agi kampus se badha e kacamadan Gading Sumenep kalaban dhuwa’ Program Studi enggi paneka: PMI (Pengembangan Masyarakat Islam) tor BKI (Bimbingan Konseling Islam). Taon 2021 ampon mewisuda 39 mahasiswa se elaksana’agi e gedung Islamic Centre Bindara Saod. Manabi sampeyan terro onenga STIDAR bisa amaen ka stidar.ac.id tor jamaru.com.

Posting Komentar

Lebih baru Lebih lama