Sastra Madura Minim Apresiasi

Apresiasi dhalem tolesan paneka banne coma eberri' pesse tor tandha pangesto dhari pamarenta, napa pole jat (sa)Madura pamarentana, Madura gi' nalpe' ekalemonganga Jaba Temor, (ca'na sampeyan pon mon aneka ekera adukung Madura daddi propinsi). 

Samangken media se narema tolesan basa Madura bisa ekoca' ampon bannya', molae dhari Jawa Pos Radar Madura, Jokotole, samangken ampon badha Jatimkini.id, salaen paneka badha jugan se gasek mangombar tolesan basa Madura se bisa ebaca, enggi paneka Arsip Prosa Madura, Serrat Pote tor laen epon, tello' media se bingkeng neka aropa'agi media panyempennan (arsip), sanajjan kadipaneka sampeyan bisa maca tor ajar kalaban badhana tolesan se badha e media kasebbut (arsipprosamadura.com, serratpote tor jugan).

Kabid dhari 2015 Radar Madura istiqoma makalowar carpan tor sanja' basa Madura, tanto ce' rammena, bannya' se makerem sopaja bisa emuat e Radar Madura. are mangken, acora' ampon olle ngorange. Olle asat. Daggi' pas loppa pole ka sastra Madura.

Dhalem sastra paneka, otamana monggu sadaja tolesan se pon ngombar e Radar Madura otaba majala Jokotole ka'dhinto minim apresiasi, enggi ka'dhinto sobung se apareng kritik, minimal husus epon monggu carpan tor sanja'na. Manabi nalektegi sastra Indonesia paneka bannya' apresiasi molae dhari ebahas, ekritik, eajari esakola'an, badha teorina, ekabanta banne gun e barung kobi, kellas sakola'an, namong jugan badha kompolan akadiya komunitas, komunitas se epabadha sareng ngongodhadan sopaja badha musyawarah, rembag sastra. Manabi e jogja dhimen badha Masyarakat Bawah Pohon, Komunitas Rudal, tor Teater ESKA mabadha diskusi sastra e bakto se ampon etantowagi.

Toju' apolong. Diskusi. Kadinapa oca'na, kadinapa kalimadda tor laen samacemma. eajari secara lebbi serius. Napa pole pajat mon noles cerpen/puisi tor ngombar e media neka olle pesse, saenggana bannya' se ajara tor diskusi. Sastra Madura, bila pon ngombar e media, neka coma esaba' e fesbuk, olle pangocap, selamat, keren, mantap, ban samacemma. sobungnga apresiasi aneka sajan mamacet, maberging sastra Madura, etamba se nolesa sastra basa Madura neka sajan lempo, sajan lesso polana sobung pessena. Cellep.

Apresiasi monggu sastra basa Madura neka gi' minim, sopaja ta' ekoca' tadha'. Badhana paneka monggu coma bila badha kababbaran buku basa Madura, sela bariya bila mabadha acara ja' bakal mabadha acara “Kababbaran Buku Madura” e settong tempat, tor jugan reng-oreng neka menta'a bukuna, sakone' se melleya. Aneka sajan maberging sastra Madura.  samangken ampon sajan sakone' se maca'a buku sastra basa Madura. sajan sobung se melleya. Duch neserra kare noles sara-sara taona tadha melle. Kala baruy bariya. Enggi tolos berging tadha' napa.

Ja' senga minimal badha kompolan, komunitas se jugan mabadha diskusi kaangguy ajar, nalektegi kadinapa kalemadda, kadinapa sosonan oca'na dhalem sanja'-sanja'na, tanto paneka bukuna bakal esare. Bakal ebaca. Kemungkinan se raja paneka bakal melle. Korang oneng enggi kadinapa sastra Indonesia, ampon sajan maju? Taon 2022 acora' gi sobung buku se ngombar. Acora' pon lesso. Se ampon bannya' nerbittagi buku enggi paneka Lukman Hakim Ag ampon empa' buku. Mat Toyu jugan empa' buku, Zainal Abidin Hanafi tor N Shalihin Dhamiri neka dhuwa' buku ebang.

Enggi pajat sastra Madura neka buru merte', enggi pajat badha ajalan. Arangka'. Napa pole sobung tim ahlina, sobung guru besar basa Madura. entara ka guru besar. Jarengan sarjana Pendidikan Basa Madura bai sobung. Kampus-kampus jugan sobung program studi basa Madura, otamaepon kampus se badha e Madura (negeri-swasta).

Enggi mon rengkeng, berging neka banne pasera se esala'agiya. Enggi kaula sareng sampeyan se buru apangrasa are mangken ja' pajat parlo sopaja arabat basa Madura. manabi sampeyan aromasa ta' parlo ka basa Madura. enggi ta' anapa jugan. Napa pole kantos maemot, ngarepot sastra Madura. pasabbar! Dhu epabaremma'a pole!

Posting Komentar

Lebih baru Lebih lama