Ngaji Literasi, Banne Terasi

 

Ngaji Literasi, Banne Terasi

Acara paneka kalampan e are Salasa pon, bulan Jumadil Awwal 1443 (28 Desemeber 2021) e Madrasah Taufiqurrahman, kalaban Shohibul Hajat enggi ka’dhinto (PK IPNU-IPPNU) SMA Taufiqur Rahman Longos. Dhalem lalampan paneka, rabu salerana se Molja Zainul Muttaqin, Mat Toyu, tor jugan Lathif Kobhung se pajat biasa lebur lan-jalanan.

Tantona acara paneka nyopre kabunga’an tor ajaga sataretanan kalaban mamole elmo tor pangaonengan se ampon esergu’ dhari Rahim epon Taufiqur Rahman. Lalampan paneka ekabidi kalaban pamaosan Ummul Qur’an, se eseppowe sareng Salerana se Molja, Keyae Marzuki, Pengasuh tor se nyeppowe Madrasah Taufiqur Rahman. Acara paneka jugan ngonjang la-bala tor ca-kanca dhari dhari Madrasah aliyah se badha e di’-seddi’na Taufiqur Rahman, Akadiya Mambaul-Ulum, rabu jugan Pimpinan PAC IPNU-IPPNU Gappora. Tantona, acara paneka ta’ bakal kalaksana manabi sobung Pembina se parjuga enggi paneka Hendrian As’adi.

Dhalem acara paneka, saamponna lastare sambutan-sambutan tor jugan do’a. acara paneka ekabidi tor eereng kalaban moderator Khelmy Khan, lanceng se biasa noles cerita pendek tor ampon ngombar e pan-barempan media. Se adha-kandha kabidan enggi paneka Mat Toyu. Mat Toyu amolae kalaban gaja’/meler ja’ literasi neka banne bab satu liter terasi, terasi neka acan. Saamponna padha ngagali ja’ literasi paneka bab/persoalan kadinapa carana maca tor noles, lebbi semma’ kalaban ma’na; ahlina dhalem maos tor noles, otaba bisa jugan esebbut kalaban oreng se gadhuwan kaahlian tor pangalaman dhalem ngola pangaonengan, bisa aropa’agi informasi tor pangajaran sopaja daddi kaahlian dhalem kaodhi’an.

Kalaban ajar otaba ngaji literasi paneka, reng-oreng paneka banne sakadar odhi’, namong bila gadhuwan pekkeran paneka esampeyagi kalaban tolesan se bisa emaos, tantona kalaban tolesan se samporna. Kadinapa carana sopaja emaos. Paneka lakar se kodu eajari sampe’ sobung omor. Kadinapa sopaja bisa noles, enggi paneka emolae kalaban maos, maca, maca, maca, banne macalennot kana’.

Al-Qur’an apareng petodu, kalaban ayat se pertama toron paneka marenta sopaja maca, maos, maca. Enggi paneka Iqra’. Anapa’ ma’ kodu Iqra’, anapa ma’ kodu maca, enggi sopaja sampeyan maca, maos, maca. Baca ganeka kabbi se badha e Salongar.com. saestona Mat Toyu lat-nyalalat se eteranggi, sampe’ al-moallaqot tor laen samacemma.

Pak zainul Muttaqin, apareng semangat, kalaban ajarbaba’agi anapa oreng paneka kodu noles, akadiya se esampeyagi Pramoedya Ananta Toer kalaban dhabuna “orang boleh pandai setinggi langit, tapi selama ia tidak menulis, ia akan hilang dari sejarah. Menulis adalah bekerja untuk keabadian” tor dhari Imam Ghazali, “Jika dirimu bukan dari keturunan Raja, maka menulislah” maksod dhari dhadhabun paneka, sopaja bila pon sobung, aneka gi’ badha bukuna se terros odhi’, sanajjan Mat Toyu sobung omor, wafat, paneka gi’ badha Embi’ Celleng Ji Monentar, Kerrong ka Omba’ se bakal paggun ngalemba’, otaba Pak Zainul Muttaqin kalaban Celurit Hujan Panas, tor jugan Neraka Pemikat, orang-orang tetap terpikat dan ingat pada Zainul Muttaqin. Badha karena.

Zainul Muttaqin jugan apareng semangat, ja’ aba’na tor Mat Toyu kalaban noles bisa oneng dha’ pan-saponapan tempat, jugan bisa terkenal, bisa daddi cerpenis nasional, bisa apanggi bupati, bisa apanggi mentri, manabi sampeyan oneng pak D Zawawi Imron, aneka ta’ lulus SR (Sekolah Rakyat) namong bisa apareng kuliah saponapan professor tor guru-guru besar, anapa polana, asabab maca tor noles. Pak D Zawawi se jugan kalonta kalaban Keyae kasebbut jugan seggut, eonjang ka nagara manca, sampe’ eonjang ka Balanda kaangguy maos Puisi. Enggi tantona ta’ kalaban makaloar pesse dibi’, eongkose ban ebajari. Mon gi’ nyettho’ kasang dibi’, enggi ta’ kera entar keya.

Jugan akadiya Muna Masyari, oreng disa jugan, keng samangken bannya’ oreng ampon se oneng, amarga buku-bukuna paneka ngaolle tandha Pangesto dhari Kemendikbudristek taon 2021. Tanto obangnga raja. Hehe…

Tor jugan same, sopaja bisa noles, paneka kodu maca. Maca. Maos. Ca’na se na’-kana kodu selleme kaodhi’an. Sopaja ngagali artena malem se petteng tor laen samacemma. tantona Mat Toyu sareng Zainul Muttaqin ngarep, kalaban badhana paneka, Taufiqur Rahman bisa odhar, same kalaban sakola’an se laen, ret-moredda aktif, lancar dhalem literasi, ta’ kodu daddi penyair, bisa jugan daddi penyiar. Se otama enggi paneka. Maca. Maca. Maca.

Posting Komentar

Lebih baru Lebih lama