Morak Tellasan Topa'


OCA' topa' kalonta kalaban kerata basa se agandhu' pangarteyan enggi paneka “Matopo Tabu' se Kepa' aneka pajat lerres tor sapla', topa' napa bain essena se biasana enggi paneka aesse dha'aran akadi topa' nase' pote otaba topa' nase' jagung. Napa pole topa' kasebbut edha'ar e teppa'na tellasan topa'. Tellasan topa' pon biasa elaksana'agi pettong are salastarena tellasan ramellan (Tellasan Sabal, Tellasan Idulfitri). 

Metorot pan-saponapan bangaseppo tor guru neka elaksana'agi oreng-oreng se apowasa sabal, enggi paneka apowasa ennem are salastarena/kalagguanna tellasan Ramellan, kantos samangken tellasan topa' paggun elaksanaagi kalaban maramme arebba topa' monggu tan-taretan se badha e semma'na compo'na se ka'dhimma bala tangga neka kasambut pa' polo compo' dha' sadhaja ra-ara.

Bannya' se adhabu, manabi morak topa' neka epanyengrat (serong) e tengngaan saenggana topa' bakal madhuwa, bunten ta' ekerra' orongnga topa'na malolo lebat penggir se anyababbagi topa'na paggun paddu empa'. Saestona garowa morak atena dibi' napa ampon socce napa bunten saamponna apowasa satawon (ka'dhinto metorot bannya' dhabu ja' manabi apowasa sabulan etambai kalaban powasa sabal ennem are (nyawal), neka kasebbut apowasa satawon, maemot satawon neka badha tello ratos sabidak are). 

Saestona powasaan neka kaangguy ngabas aba' dibi', ka'angguy akaca ponapa ate gi' garadda' otaba ngaresnges. Saestona powasa'an neka ngajari aba' ngekker, sanajjan badha se madhapa' ja' powasa'an neka madhammang padha'aran se alako dhalemmanna sataon. Banne coma ngekker adha'ar otaba ngenom, se sara enggi paneka ngekker sopaja ta' ma'-semma' dha' laranganna agama islam. 

Powasaan jugan ngajari monggu dha' oreng se andhi' (oreng sogi) sopaja arassae kadinapa rassana daddi oreng ta' andhi', se sobung edha'ara, se kodu abalangngaja gallu se olleya dha'aran, mela dhari ganeka badha kawajiban makalowar zakat sopaja oreng-oreng se sakone' pangaselanna, jugan ngaolle rajekke, ngaolle kajembaran e are tellasan, saenggana ta' mellas tor ta' nespa e are tellasan.

Se paleng sara dhalem apowasa neka ngekker sopaja ta' abalanja sampe bi-talebbi (konsumtif), nekkane kabotowan banne sampe' nekkane sadhaja pangaterrona napso (perilaku konsumtif). Kalaban badhana powasa, sopaja ta' bannya' abalanja, sajan kabudhi sajan sakone' balanja'an, sajan sakone' adha'ar, tor ta' ngacaca juba'na oreng.

Posting Komentar

Lebih baru Lebih lama