Kembang Kabunga'an

TORA


E Molae are ahad tanggal 26 Juli 2015, Jawa Pos Radar Madura apareng rubrik sastra budaya, se ka'dhimma badha dhuwa' kamar, enggi paneka kamar khusus Sanja' tor Carpan. 

Kalaban badhana Rubrik Sastra Budaya paneka, sabban are Ahad ngombar tolesan aropa sanja' tor carpan (tantona kalaban basa Madura). Metorot Lukman dhalem "TORA" sampe' panotop 2016 (Desember), ampon ngombar 140 sanja', 63 Carpan. Dhari 63 paneka epasettong dhalem buku " TORA" Satengkes Careta Pandha' (Juli 2015-Desember 2016) anggidanna salekor oreng enggi paneka A. Hamzah Fansuri B. Abd  Rahem, Amirul Muttaqin, Andi Fathorrazi, Bib, Budi Santoso, Fathor Rosi, Hasmidi, Juwairiyah Mawardy, Ly Bintang, M Toyu Aradana, Ma Leo, Mudhar CH, Musyfieq RZ, Nur Aisyah, Set Wahedi, Siti Fatimah, Ubaidillah Hasani, Uswatun Hasanah, Uswatun Syarifah, Yulistiana Ningsih.

Acem-macem careta dhalem buku paneka, Akadiya A. Hamzah Fansuri B se acareta oreng se mangkat ka nagara manca, alako daddi TKI, ampon abit ta' paleman, lebbi sapolo taon saenggana pon eanggap sobung omor, e tahlili, sabab pon sobung kabar.

Badha jugan acareta reng bine' (Randha Ngodha) se tapaksa alajjai reng lake', polana aba'na edinggal lakena, edhimma aba'na kodu abalanjai ban apareng kaodhi'an ka aba'na ban ana'na, ja' senga gi' nemmo balanja (pesse) tanto ta' terro se alajja'ana lalake' se agudha malolo (Budi Santoso).

Sajan dhalem "Kamar Petteng"-nga Hasmidi, magarimengan, asabab reng bine', se sabban are-sabban malem odhi' dhalem kamar, ta' kaloaran. Ta' nemmo seyang, malem, celleb, panas, aba'na epangger, sabab bila eocolo, bannya' rang-barang tatanggana ekeba ka bengkona. Ka Maryati elang pekkeranna, mongsar, odhi'na, reng seppona mon ta' sanggup se nyareya bukona tamba, teggal ban dhi'-andhi'na, tamaso' saba pon tadha' ejuwal. Ekeba nyare bukkna tamba (hal. 65).

Badha jugan careta kembang Polo Raas, e tarebung odhi' agantong tor careta-careta laenna se magarimengan tor magettonan.

Asabab badhana JPRM tor ngombarra buku "TORA" paneka, sastera Madura sajan nyenna, tombu tor akembang molae 2015 kantos taon mangken. Napa pole ampon badha se ngaolle tandha pangesto dhari Hadiah Sastera Rancage e taon 2020 (Kerrong ka Omba') tor 2021 (Sagara Aeng Mata Ojan).

Ka adha' samoga'a Sastera Madura sajan nyenna tor akembang ana-berna.


Judul: Tora

Editor: Lukman Hakim AG

Penerbit: JP Radar Madura bekerja sama VC Abida Mahran (Publishing House).

Cetakan: 2017

ISBN: 978-602-51160-3-2

Sastera Madura

Posting Komentar

Lebih baru Lebih lama