Joe Mawar, Mama Lodeh dhari Bume Oker

Joe Mawar atau biasa jugan kalonta sareng Juwairiyah Mawardy aropa’agi pangarang fiksi, akadiya buku novel se ampon ngombar tor ekaleburi bangsa enggi paneka “Lelaki Suci” se ngombar e taon 2022 lebat penerbit Galaksi Aksara Kita (Sidoarjo Jawa Timur). E taon 1995, bakto gi’ toju’ e bangku kellas dhuwa’  Tsanawiyah, karanganna se aropa sanja’ ampon ngombar e buku antologi "Nuansa Diam" se ngombar asabab kerjasama  "Sanggar Nuansa-sareng Radio Karimata Pamekasan", se aropa'agi antologi sastrawan/penyair sa Madura asareng barisan epon penyair se ampon kalonta akadiya  D. Zawawi Imron, Tirmidzi Jaka (Ketua DKS Samangken), Ibnu hajar tor jugan Syaf Anton WR. Joe Mawar ka’dhinto paggun noles sampe’ daddi rajina ustadz Tsabit tor ampon gadhuwan potre.

Samangken Joe Mawar ka’dhinto ce’ sibukna asabab salaen noles, akadiya noles dhalem tello polo are, jugan noro’ pan-saponapan kegiatan. Salaen daddi pendamping disa bagian bara’ Pragaan (pendamping disa Pakamban Lao', Pragaan Lao' tor Kaduara Temor), Joe Mawar neka jugan aktif neng Fatayat NU Sumenep, PKK Kecamatan Pragaan, tor jugan gasek ngesse’e pangajiyan otama epon bila badha bin-kabin kaangguy madhapa’ (ceramah) hikmatun nikah (banne nikmadda oreng abine kana’, ya ekabala keya ne’-sakone’ rowa malle se gi’ ta’ abine-ta’ alake, malle barenteng keya, malle duli nyare). Mela dhari paneka aba’na pas nyebbut aropa mama lodeh, se biyasa ngesse’e pangajiyan e TP.

Bannya’ oreng se adhabu ja’ Joe Mawar ka’dhinto lebur bila adhabu (cerama), ngeppas dha’ bannya’ pekkeran sampe’ bannya’ tokang ngeas (MUA) tapengsor dha’ dhabuna Joe Mawar. Mela dhari paneka tantona sampeyan padha mareksane, Joe Mawar paneka potrena pasera.

Enggi lerres. Asma epon reng seppo lake’na enggi paneka H. Mawardy, dhimen gadhuwan meubel lamari, jangka’, lencak oker e lao’ lorong disa Karduluk, Jl Raja Sumenep-Pamekasan Madura. H. Mawardy paneka oreng se majaga hadrah akadiya Hadrah Al-Mukminin tor Al-Kawakib, dhuwa' pakompolan hadrah kasebbut gi' badha (eksis) kantos are mangken. Salaen paneka jugan lebur (pemerhati) dha' saronen tor lodruk, tor ahli bila adungngeng dhalem basa madura.

Bila ebirji' pole, reng seppo lake' epon H. Mawardy, se asmaepon enggi paneka K.H Ismail (kakek Joe Mawar) aropa'agi ahli macopat/mamaca, ahli rokat pandhaba, guru ngaji langgaran tor biyasa molang ketab Safina-Sullam. Manabi dhari reng seppo bine' aropa'agi keluarga se ahli ibada, ngaji (shohibul qur'an). Saenggana patot manabi Joe Mawar ka'dhinto daddi penyair se ahli ceramah asabab aropa'agi ampon badha bibit dhari sadaja reng reppona. Ca'epon reng seppo kona, bila toronna kandhilis ta' kera kalowar biraso.

Joe Mawar ka’dhinto asakola e Madrasah Ibtidaiyah Annajah 1, jugan asareng MTs tor jugan MA-na, jugan mondhuk, tor mangkat asakola ka tana jaba, enggi paneka e Malang Raya e kampus UIN Maulana Malik Ibrahim Malang. Kalaban badha e Malang, aba’na sajan lebur ka tolesan tor agabung dha’ pan-barempan pakompolan se padha ajar noles. Tor samangken gi' lebur dha' ka elmo enggi paneka kalaban asakola S2 e kampus: IAI Al-Khoziny Sidoarjo, Jaba Temor. Salaen pendamping desa, pendamping Ustadz Tsabit, jugan menangka "Pewarta e LTNU Sumenep."

Dhari ka'dhinto tanto tolesan-tolesanna gasek ngombar e media lokal otaba nasional, e Radar Madura (Jawa Pos Group), Majalla Sastra Horison, Kartini, tabloid Nova, Koran Republika, Surya, Surabaya Post, Tabloid Cempaka (Suara Merdeka Group). Tolesan epon amacem, molae dhari sanja’ (puisi), carpan (cerpen) jugan artikel tor jugan maso’ dhalem antologi sastra. Buku epon salaen Lelaki Suci, enggi paneka Mati Tua se aropa’agi kompolan cerpen (JWriting Soul, 2021). Novel epon se kapeng dhuwa' bakal ngombar sakejja' laggi': Bintang Jatuh di Hati Afnani.

Saenggana patot ngaolle onjangan dhalem seminar penulisan kaangguy daddi narasumber (seminar-pelatihan penulis). Jugan ekaparcaja kaangguy membina santri kalaban daddi Roisah (kepala) Madrasah Diniyah Baitul Atiq (ponpes), Somangkaan, Karduluk Pragaan.

Kantos samangken Joe Mawar nettep e Blajud Karduluk, Pragaan Songennep Madura, sampeyan bisa akanca kalaban FB-na: Joe Mawar.

Posting Komentar

Lebih baru Lebih lama